City godet Arsenalin në garën për titull

Manchester City ka marrë një fitore shumë të rëndësishme 2-1 ndaj Arsenalit në “Etihad”, duke iu afruar në vetëm tri pikë rivalit për titull në Premier League, ndërsa ka edhe një ndeshje më pak të zhvilluar, shkruan Rekordi.net.

Ky duel u konsiderua vendimtar në garën për titull, mes trajnerit me përvojë Pep Guardiola dhe nxënësit të tij, Mikel Arteta. Arsenali e nisi ndeshjen me nervozizëm, duke rrezikuar herët pas një gabimi në mbrojtje, ndërsa edhe Rayan Cherki goditi shtyllën.

Megjithatë, ishte pikërisht Cherki ai që zhbllokoi rezultatin, duke kaluar bukur mbrojtjen e Arsenalit dhe duke shënuar për 1-0. Gëzimi i vendasve zgjati pak, pasi vetëm dy minuta më vonë, një gabim i portierit Gianluigi Donnarumma u shfrytëzua nga Kai Havertz, i cili barazoi shifrat.

Pjesa e parë u karakterizua nga pasiguri në mbrojtje nga të dyja skuadrat, por pa gola të tjerë.

Në pjesën e dytë, City rriti presionin dhe krijoi disa raste të mira. Vendimtari erdhi nga Erling Haaland, i cili shfrytëzoi një aksion të bukur dhe shënoi për 2-1, duke mposhtur David Raya.

Arsenali tentoi të reagojë deri në fund, duke goditur edhe shtyllën dhe duke krijuar disa raste të rrezikshme, por pa arritur të gjejë golin e barazimit. Në minutat shtesë, Havertz pati mundësinë më të mirë, por goditja e tij shkoi mbi portë.

Kjo humbje është goditja e katërt radhazi për Arsenalin në garat vendase, duke vënë në rrezik serioz shpresat për titull pas një pritjeje 22-vjeçare. Nga ana tjetër, Manchester City vazhdon formën e mirë dhe duket i vendosur për të fituar titullin e pestë në gjashtë sezonet e fundit. /Rekordi.net