BE shqyrton vendosjen e kufizimeve të moshës për mediat sociale, propozohet ndalimi nën 13 vjeç

Presidentja e Komisionit Evropian, Ursula von der Leyen, ka bërë thirrje zyrtare për rregullimin e qasjes së fëmijëve në mediat sociale përmes një sistemi të kufizuar me faza. Deklarata vjen paralelisht me dorëzimin e një raporti nga një panel i posaçëm i Bashkimit Evropian, i cili rekomandon ndalimin e qasjes për personat nën moshën 13 vjeç, derisa kompanitë e teknologjisë të provojnë sigurinë e platformave të tyre.

Ky diskutim në nivel evropian përkon me një valë kufizimesh globale, ku shtete si Australia, Mbretëria e Bashkuar, Turqia dhe Indonezia kanë miratuar tashmë ndalime për përdorimin e platformave si TikTok, YouTube dhe Instagram nga fëmijët nën 15 ose 16 vjeç.

Aksesi gradual dhe paralelizmi me ligjet e tjera

Në prezantimin e qëndrimit të saj, Von der Leyen, e cila ka profesionin e mjekes, u ndal fillimisht te moshat më të vogla, duke saktësuar se fëmijët nën 3 vjeç nuk duhet të ekspozohen fare ndaj ekraneve. Ajo kërkoi që hyrja në hapësirën dixhitale të rregullohet me ligj, ngjashëm me proceset e tjera të rritjes.

“Ashtu siç nuk u japim fëmijëve tanë çelësat e makinës para se të kenë patentën, ose nuk i lejojmë të blejnë alkool derisa të lejohen ligjërisht. Duhet të përcaktojmë moshën në të cilën ata mund të hyjnë ligjërisht në mediat sociale”, deklaroi Von der Leyen përpara gazetarëve.

Kreu i ekzekutivit të BE-së specifikoi gjithashtu mekanizmat teknikë që nxisin varësinë te të rinjtë, duke veçuar procesin e lëvizjes pa fund të faqes (endless scrolling) si një nga tiparet kryesore që kompanitë e teknologjisë janë të detyruara të adresojnë.

Barra e provës mbi kompanitë e teknologjisë

Raporti i dorëzuar të hënën nga paneli i posaçëm për sigurinë e fëmijëve në internet pritet të jetë baza e propozimit të ardhshëm politik që Komisioni Evropian do t’u paraqesë 27 vendeve anëtare. Dokumenti përcakton një ndryshim të strategjisë juridike, duke zhvendosur përgjegjësinë te prodhuesit e programeve.

Qëndrimet kryesore të raportit specifikojnë se barra e provës për sigurinë e platformave duhet të jetë mbi ofruesit e shërbimeve dixhitale, dhe jo mbi rregullatorët, prindërit apo fëmijët.

Rekomandohet akses i kufizuar brenda BE-së për të gjithë fëmijët nën moshën 13 vjeç, deri në vërtetimin e sigurisë së shërbimit.

Sugjerohet që vendet anëtare të marrin në konsideratë kufizime të mëtejshme paraprake të moshës edhe për fëmijët që e kalojnë këtë prag.

“Derisa të demonstrojnë se shërbimet e tyre janë të sigurta që në fillim, mediat sociale dhe ofruesit e tjerë të shërbimeve dixhitale duhet të kenë akses të kufizuar për fëmijët nën moshën 13 vjeç në BE”, thuhet në tekstin e raportit të ekspertëve.

Ndonëse Komisioni Evropian nuk ka përcaktuar ende kufijtë e saktë për moshat më të mëdha, dega ekzekutive pritet të dalë me një projektligj zyrtar të strukturuar në të ardhmen e afërt. /rtsh/