Barcelona ‘shkel’ Sevillën, Raphinha shkëlqen me ‘het-trik’

Barcelona ka vazhduar serinë pozitive në La Liga, duke triumfuar me rezultatin 3-1 në udhëtim ndaj Sevillës, në një ndeshje ku protagonisti absolut ishte Raphinha.

Braziliani realizoi tre gola dhe u bë futbollisti i parë i Barcelonës pas 11 vitesh që shënon një “het-trik perfekt” në kampionatin spanjoll, ndërsa Lamine Yamal kontribuoi me dy asistime në suksesin e skuadrës së Hansi Flick.

Barcelona e nisi ndeshjen me raste të mira dhe Yamal ishte pranë golit në minutat e para, por goditja e tij nga distanca u ndal nga shtylla.

Megjithatë, Sevilla kaloi e para në epërsi. Youssouf Fofana realizoi me kokë pas një asistimi të Felix Correias, duke mposhtur portierin debutues të Barcelonës, Dominik Livakovic.

Epërsia e vendasve nuk zgjati shumë. Raphinha barazoi shifrat pas një depërtimi të zgjuar në zonë, duke shfrytëzuar asistimin e Andreas Christensen dhe duke realizuar me qetësi për 1-1.

Në pjesën e dytë, Lamine Yamal mori rolin kryesor në krijimin e aksioneve. Talenti spanjoll shmangu dy mbrojtës të Sevillës dhe asistoi për Raphinhan, i cili me kokë realizoi golin e dytë personal dhe të epërsisë për Barcelonën.

Braziliani ishte pranë “het-trikut” edhe nga goditja e këndit, por topi u ndal në shtyllë. Megjithatë, ai kompletoi mbrëmjen e tij të shkëlqyer pak para minutës së 70-të, duke shfrytëzuar një tjetër asistim të Yamalit dhe duke dërguar topin mbi portierin Odysseas Vlachodimos për rezultatin përfundimtar 3-1.

Ky ishte “het-tricku” i dytë radhazi për Raphinhan, i cili tashmë ka realizuar 14 gola në të gjitha garat këtë sezon.

Me këtë fitore, Barcelona regjistron suksesin e shtatë radhazi në La Liga dhe forcon pozitën në krye të tabelës, duke krijuar një epërsi prej gjashtë pikësh ndaj ndjekësve.

Në anën tjetër, Sevilla mbetet në mesin e skuadrave që synojnë zonën evropiane, duke e mbyllur këtë fazë të kampionatit në vendin e pestë.