Flick kritikon Barcelonën pas barazimit me Vallecanon

Barcelona nuk ka arritur të marrë më shumë se një pikë në udhëtimin te Rayo Vallecano, duke barazuar 1-1.

Katalonasit kaluan në epërsi me golin e Lamine Yamal nga penalltia në pjesën e parë, por vendasit barazuan rezultatin me Fran Perez në fraksionin e dytë.

Pas ndeshjes, trajneri i Barcelonës, Hansi Flick, ka kritikuar skuadrën e tij për paraqitjen jo të mirë në duel me Vallecanon.

“Një pikë është në rregull. Nuk e merituam më shumë. Bëmë shumë gabime. Nuk ishte një ndeshje e mirë. Duhet të bëjmë më mirë,” tha gjermani.

Flick theksoi rëndësinë e mentalitetit dhe përkushtimit të plotë nga të gjithë lojtarët, sidomos pas përfundimit të afatit kalimtar.

“Nëse të gjithë kanë qëndrim të mirë, do të bëjmë më mirë. Gjëja më e rëndësishme është që pas mbylljes së afatit kalimtar, secili të jetë 100 për qind i përkushtuar. Nuk duhet të ketë ego, sepse ato e shkatërrojnë suksesin”, ka pohuar strategu gjerman.