Ukraina godet thellë brenda Rusisë

Lufta në Ukrainë ka hyrë në ditën e 1,660-të, ndërsa përplasjet dhe sulmet ajrore kanë vijuar në të dyja anët.

Forcat ukrainase kanë deklaruar se kanë kryer sulmin më të thellë në territorin e Rusisë që nga fillimi i luftës, duke goditur një objekt për përpunimin e gazit natyror në Siberi, rreth 3,200 kilometra larg kufirit ukrainas.

Ukraina ka njoftuar gjithashtu për sulme ndaj një terminali në Novorossiysk, të përdorur për transportin e naftës, si dhe ndaj objekteve ushtarake në zonën portuale të Detit të Zi. Autoritetet ruse kanë raportuar katër viktima nga sulmet, raporton rtk.

Ndërkohë, sulmet ruse kanë shkaktuar viktima në disa qytete ukrainase. Në Mykolaiv, autoritetet ukrainase raportuan katër të vrarë dhe 19 të plagosur pas një sulmi rus. Në Sumy, një sulm në një qendër tregtare la të vrarë dy persona dhe plagosi të paktën 20 të tjerë.

Në planin diplomatik, presidenti amerikan Donald Trump deklaroi se kishte zhvilluar një bisedë “të shkëlqyer” me presidentin rus Vladimir Putin dhe se, sipas tij, Putin dëshiron të arrijë një marrëveshje për përfundimin e luftës në Ukrainë. Sipas Kremlinit, më herët ishte diskutuar edhe mundësia e një takimi trepalësh mes Rusisë, SHBA-së dhe Kinës në samitin e ardhshëm të APEC-ut.

Ndërkohë, Rumania ka mohuar pretendimet se po përgatitet të dërgojë trupa luftarake në Ukrainë, duke theksuar se nuk ka vendosur ushtarë të saj në vijat e frontit.

Në një tjetër zhvillim, studiues të kompanisë amerikane Cisco kanë paralajmëruar për një sulm kibernetik ndaj një institucioni qeveritar ukrainas. Sulmuesit dyshohet se kanë përdorur faqe të rreme CAPTCHA për të mashtruar përdoruesit dhe për të instaluar programe keqdashëse, ndërsa hetuesit dyshojnë për lidhje me një aktor rus.