Nënsekretari i OKB-së: Bordi i Paqes nuk synon të zëvendësojë Kombet e Bashkuara

I ashtuquajturi “Bordi i Paqes”, i mbështetur nga presidenti amerikan Donald Trump, “nuk është një alternativë ndaj OKB-së”, sipas nënsekretarit të përgjithshëm të OKB-së për Çështjet Humanitare, Tom Fletcher.

Fletcher hodhi poshtë sugjerimet se kjo nismë mund të rivalizojë organizatën globale. Duke folur për Euronews, Fletcher tha se si Uashingtoni ashtu edhe vendet pjesëmarrëse e kanë bërë të qartë se iniciativa nuk synon të zëvendësojë Kombet e Bashkuara.

“Ne jemi ende këtu,” tha ai, duke theksuar se OKB mbetet një organizatë e shteteve anëtare me më shumë se 190 vende, e aftë për të koordinuar reagimet globale ndaj konflikteve dhe krizave, transmeton euronews.al.

Fletcher shtoi se nuk ndihet i kërcënuar nga krijimi i formateve të tjera diplomatike, duke shtuar se “ka mjaft konflikte në botë” që mund të zgjidhen përmes përpjekjeve shumëpalëshe.

Deklaratat e Tom Fletcher vijnë në një kohë kur kritikat ndaj efikasitetit të OKB-së po rriten, ndërsa luftërat dhe tensionet gjeopolitike intensifikohen.

“Kjo është një kohë pandëshkueshmërie, përçarjeje dhe polarizimi. A është OKB perfekte? Aspak. Por nuk do të pranoj sulmet që vijnë ndaj nesh. Ne përfaqësojmë papërsosmëritë e botës,” tha ai, duke vënë në dukje se organizata mund të veprojë vetëm kur shtetet anëtare i japin një mandat – diçka që po bëhet gjithnjë e më e vështirë në një klimë gjeopolitike të polarizuar.

Fletcher tha se situata humanitare në Lindjen e Mesme po përkeqësohet, duke theksuar konfliktet nga Sudani në Gaza dhe Liban, ku shpërndarja e ndihmave po bëhet gjithnjë e më e rrezikshme.

Ai theksoi se dhjetëra mijëra njerëz janë zhvendosur në Liban, duke e përshkruar situatën si “shumë të rëndë”. Në të njëjtën kohë, për shkak të konfliktit në Iran, qindra mijëra persona janë zhvendosur brenda vendit. Megjithatë, për momentin nuk ka valë të mëdha migrimi ndërkufitar.

Sa i përket rrezikut të një përshkallëzimi më të gjerë rajonal, Fletcher përmendi mundësinë e një dialogu diplomatik mes Izraelit dhe Libanit, pasi Bejruti ka sinjalizuar gatishmërinë për bisedime të drejtpërdrejta.

“Rruga është përmes dialogut dhe diplomacisë, jo përmes dhunës më brutale,” përfundoi ai.