Hoti: Reduktimet e rrymës në vitin 2026 janë dëshmi e keqmenaxhimit të qeverisë

Deputeti i Lidhjes Demokratike të Kosovës (LDK), Avdullah Hoti, ka reaguar ashpër pas rikthimit të reduktimeve të energjisë elektrike, duke i cilësuar ato si pasojë të drejtpërdrejtë të keqmenaxhimit dhe mungesës së vizionit nga ana e qeverisë.

Sipas Hotit, është e papranueshme që qytetarët dhe bizneset në Kosovë të përballen me ndërprerje të rrymës në vitin 2026, ndërsa përgjegjësia, sipas tij, është politike dhe e drejtpërdrejtë.

“Askush nuk mund të fshihet pas njoftimeve teknike, kur përgjegjësia është politike dhe direkte. Energjia nuk është luks, është e drejtë themelore”, ka shkruar Hoti.

Ai ka theksuar se çdo reduktim i energjisë elektrike përbën dëshmi të qartë të keqmenaxhimit, mungesës së vizionit dhe neglizhencës ndaj interesit publik.

“Qytetarët po paguajnë çmimin e dështimit të kësaj qeverie me errësirë, me dëme ekonomike dhe me pasiguri”, ka përfunduar Hoti.