Zelensky: Anëtarësimi në BE duhet të jetë pjesë e garancive të sigurisë

Presidenti ukrainas Volodymyr Zelensky u shpreh sot në favor të anëtarësimit të vendit të tij në Bashkimin Evropian si pjesë e garancive të sigurisë për Ukrainën.

“Ndër garancitë e sigurisë që shohim, anëtarësimi në Bashkimin Evropian është një garanci e detyrueshme ekonomike, politike dhe gjeopolitike e sigurisë”, tha Zelensky në një konferencë të përbashkët për shtyp me presidentin francez, Emmanuel Macron në Paris.

Zelensky theksoi se kjo ishte një “pikë e veçantë” në diskutimet që po zhvillohen.

Deklaratat e tij erdhën pas mbledhjes së liderëve të “koalicionit të vullnetshëmve” në Paris për të diskutuar mbështetjen për Ukrainën e goditur nga lufta.

Kievi po përpiqet të zmbrapsë një pushtim të plotë rus për më shumë se tre vjet e gjysmë, me mbështetjen e Perëndimit.

Koalicioni, i cili përfshin më shumë se 30 shtete, po diskuton format e mbështetjes për Ukrainën, për ta mbrojtur vendin nga agresioni i ardhshëm rus sapo të arrihet një armëpushim ose marrëveshje paqeje.

Traktatet e BE-së përmbajnë gjithashtu një klauzolë për ndihmë ushtarake. /atsh/