Von der Leyen: BE-ja duhet të përballet me luftën hibride të Rusisë me vendosmëri dhe unitet

Presidentja e Komisionit Evropian, Ursula von der Leyen, deklaroi të mërkurën se Evropa duhet të forcojë mbrojtjen e saj për të penguar “luftën hibride” të Rusisë, pas një sërë incidentesh që përfshijnë ndërhyrje ajrore, sulme kibernetike dhe dëmtime të kabllove nënujore.

“Këto nuk janë ngacmime të rastësishme, por një fushatë e qëllimshme dhe në rritje që operon në zonën gri të mohimit,” tha ajo para ligjvënësve të BE-së.

“Dy incidente mund të jenë rastësi, por tre, pesë, dhjetë – kjo është një strategji e synuar kundër Evropës, dhe ne duhet të reagojmë.”

Sipas saj, vendet si Polonia, Estonia dhe Rumania janë goditur së fundmi nga ndërhyrje ajrore ruse, ndërsa dronë të paidentifikuar janë vërejtur në Danimarkë, Gjermani dhe Belgjikë.

Në këtë kontekst, BE-ja po shqyrton ndërtimin e një “muri mbrojtës kundër dronëve” si pjesë e projekteve të përbashkëta të mbrojtjes.

Von der Leyen theksoi se përballimi i këtyre kërcënimeve kërkon një “mentalitet krejtësisht të ri” dhe paralajmëroi se hezitimi për të vepruar do të çojë në zgjerimin e zonës gri. “Misioni themelues i BE-së është ruajtja e paqes, dhe sot kjo nënkupton aftësinë për të penguar agresionin dhe provokimin.”

Në samitin e ardhshëm në Bruksel, udhëheqësit e BE-së pritet të bien dakord për një “hartë rrugore” që do të përfshijë objektiva të përbashkëta dhe afate konkrete deri në vitin 2030 për të përballuar kërcënimet nga Rusia.

“Zgjedhja është e qartë,” përfundoi von der Leyen, “Ose shmangemi dhe lejojmë përshkallëzimin e kërcënimeve, ose i përballojmë me unitet, frenim dhe vendosmëri.” /rtsh/