Kurti: Mbërrijnë në Kosovë dronët luftarakë kamikazë Skydagger

Kontejnerët me mijëra dronë luftarakë kamikazë “Skydagger” kanë mbërritur sot në Aeroportin Ndërkombëtar të Prishtinës “Adem Jashari”, ka njoftuar kryeministri në detyrë Albin Kurti.

Sipas njoftimit, dronët — të njohur si FPV të tipit RTF (Ready to Fly) — janë pajisur me mjete shpërthyese dhe synojnë të godasin objektiva lëvizëse dhe statike. Kontrata për furnizim u nënshkrua në dhjetor të vitit të kaluar me kompaninë turke Baykar, e cila është kompania amë e prodhuesit Skydagger. Një pjesë e personelit ushtarak të Forcës së Sigurisë së Kosovës (FSK), dhjetëra ushtarakë, janë tashmë trajnuar për përdorimin e këtyre dronëve.

Kurti bëri të ditur se dronët ishin parashikuar të mbërrinin në janar 2026, por arritën tre muaj më herët. Sipas njoftimit, pajisjet u ngarkuan në kamionët multifunksional Rheinmetall 8×8 që u morën vitin e kaluar — gjithsej 15 të tillë, 10 të blerë dhe 5 si donacion.

Me këtë blerje, thuhet se krahas Bayraktar TB2 dhe fluturakeve Puma, po vazhdohet ngritja dhe shtimi i fuqisë goditëse të ushtrisë me qëllim ndërtimin e një force të aftë dhe koherente me zhvillimet teknologjike dhe taktikat e luftës bashkëkohore.