Von der Leyen: Armëpushimi Izrael-Liban një zhvillim pozitiv, nevoja për paqe të qëndrueshme

Nga ana e saj, Ursula von der Leyen e përshkroi si një zhvillim pozitiv njoftimin e një armëpushimi 10-ditor midis Izraelit dhe Libanit, i cili u arrit me ndërmjetësimin e Presidentit të SHBA-së Donald Trump.

Siç tha ajo, ndërprerja e përkohshme e armiqësive është një lehtësim , pasi konflikti tashmë ka shkaktuar një numër të madh viktimash, raporton euronews.al.

Presidentja e Komisionit Evropian nënvizoi se bashkësia ndërkombëtare nuk duhet të kufizohet në një ulje të përkohshme të tensioneve, por duhet të kërkojë një marrëveshje të qëndrueshme që do të sigurojë paqe afatgjatë.

Në të njëjtën kohë, ajo përsëriti qëndrimin e Bashkimit Evropian në favor të respektimit të plotë të sovranitetit dhe integritetit territorial të Libanit, duke vënë në dukje se Evropa do të vazhdojë të mbështesë popullin e saj përmes ndihmës së konsiderueshme humanitare.