Ukraina godet tubacion karburanti pranë Moskës

Forcat ukrainase goditën një tubacion të rëndësishëm karburanti në rajonin e Moskës që furnizon ushtrinë ruse, tha inteligjenca ushtarake e Ukrainës të shtunën.

Operacioni u krye vonë të premten, sipas një deklarate në kanalin e mesazheve Telegram. Agjencia, e njohur me akronimin HUR, e përshkroi atë si një “goditje të rëndësishme” për logjistikën ushtarake të Rusisë.

HUR tha se forcat e saj goditën tubacionin Koltsevoy, i cili shtrihet për 400 kilometra dhe furnizon ushtrinë ruse me benzinë, dizel dhe karburant për avionë nga rafineritë në Ryazan, Nizhny Novgorod dhe Moskë, raporton AP.

Operacioni, i cili synoi infrastrukturën pranë rajonit Ramensky, shkatërroi të tre linjat e karburantit, tha HUR.

Tubacioni ishte në gjendje të transportonte deri në 3 milion ton karburant për avionë, 2.8 milion ton dizel dhe 1.6 milion ton benzinë në vit, tha HUR.

“Sulmet tona kanë pasur më shumë ndikim se sanksionet,” tha Kyrylo Budanov, kreu i HUR, duke iu referuar sanksioneve ndërkombëtare ndaj Rusisë të vendosura për shkak të luftës së saj totale dhe pushtimit të Ukrainës në shkurt 2022.

Moska përpiqet të marrë qytetin kyç lindor

Ndërkohë, Ministria ruse e Mbrojtjes, të shtunën, pretendoi se forcat e saj mundën një grup të forcave speciale ukrainase që u dërguan në pikën kritike të frontit lindor në Pokrovsk për të ndaluar trupat ruse të avancojnë më tej në qytet.

Rusia dhe Ukraina kanë dhënë llogari të ndryshme për atë që po ndodh në Pokrovsk, një bastion kyç ukrainas në rajonin lindor të Donetskut. Presidenti rus Vladimir Putin pretendoi javën e kaluar se forcat e tij kishin rrethuar mbrojtësit ukrainas të qytetit.

Por shefi i ushtrisë ukrainase, Oleksandr Syrskyi, duke përgënjeshtru pretendimin e Putinit, tha të shtunën se ndërsa situata në Pokrovsk mbetet “më e vështira” për forcat ukrainase, të cilat po përpiqen të dëbojnë trupat ruse nga qyteti, nuk ka rrethim ose bllokadë siç ka mbajtur Moska.

“Po zhvillohet një operacion gjithëpërfshirës për shkatërrimin dhe dëbimin e forcave armike nga Pokrovsk. Pesha kryesore bie mbi shpatullat e njësive të Forcave të Armatosura të Ukrainës, veçanërisht operatorëve të UAV-ve dhe njësive sulmuese,” tha Syrskyi në një deklaratë në Telegram.

Presidenti ukrainas Volodymyr Zelenskyy pranoi të premten se disa njësi ruse ishin infiltruar Pokrovsk, por insistoi se Ukraina po i eliminon ato.

Zelenskyy tha se Rusia kishte vendosur rreth 170,000 trupa në rajonin lindor të Donetskut të Ukrainës, ku ndodhet Pokrovsk, në një përpjekje të madhe për të kapur qytetin dhe për të marrë një fitore të rëndësishme në betejë. /rtk/