Trump nënshkruan urdhrin ekzekutiv, TikTok kalon në duart e investitorëve amerikanë

Presidenti Donald Trump ka nënshkruar një urdhër ekzekutiv që lejon krijimin e një kompanie të re amerikane për të marrë në kontroll operacionet e TikTok në Shtetet e Bashkuara. Ky veprim synon të adresojë shqetësimet për sigurinë kombëtare, sipas ligjit të vitit 2024, që parashikon ndalimin e aplikacionit nëse nuk largohet nga pronësia kineze.

Trump shtyu afatin e zbatimit të ndalimit të TikTok deri më 20 janar 2026, për të lejuar realizimin e marrëveshjes. Sipas urdhrit të ri të nënshkruar një ditë më parë, kompania amerikane që do të marrë kontrollin do të vlerësohet rreth 14 miliardë dollarë, një shumë më e ulët nga ajo që kishin parashikuar disa analistë të tregut.

Zëvendëspresidenti JD Vance tha se algoritmi i TikTok, pjesa më kritike e teknologjisë së platformës, do të ritrajnohet dhe monitorohet nga partnerë të sigurisë dhe do të jetë nën kontrollin e plotë të kompanisë së re amerikane. Investitorët do të kontrollojnë algoritmin që fuqizon versionin amerikan të TikTok, dhe amerikanët do të mbajnë gjashtë nga shtatë vendet në bordin e drejtorëve që do ta mbikëqyrin atë. Sipas urdhrit ekzekutiv të nënshkruar nga Trump, Kina do të zotërojë më pak se 20% të sipërmarrjes së re të përbashkët.

Ndër investitorët që pritet të jenë pjesë e marrëveshjes janë emra të njohur si: Michael Dell (CEO i Dell Technologies), Rupert Murdoch (Fox Corp dhe Neës Corp) dhe  disa të tjerë të përshkruar si “investitorë të klasit botëror”.

Trump tha se ka biseduar me Presidentin kinez Xi Jinping, i cili sipas tij ka dhënë miratimin për planin. Megjithatë, TikTok dhe Ambasada Kineze në SHBA nuk kanë komentuar ende zyrtarisht.

Sipas marrëveshjes, TikTok amerikan do të përdorë një algoritëm të ri i cili do të bazohet në versionin ekzistues, por i ritrajnuar në të dhënat e përdoruesve amerikanë, sipas zyrtarëve të Shtëpisë së Bardhë.

“Partnerët e besuar të sigurisë” do të monitorojnë përditësimet e softuerëve, algoritmet dhe rrjedhat e të dhënave”, thuhet në urdhrin ekzekutiv.

Oracle tashmë ruan të dhënat e përdoruesve amerikanë të TikTok në serverat e saj me bazë në SHBA si pjesë e një marrëveshjeje ekzistuese, dhe kjo do të vazhdojë. /rtsh/