Tronditet San Diego/ Dy adoleshentë sulmojnë me armë një xhami, vriten 3 persona, autorët gjenden të pajetë në makinë

Tre persona humbën jetën pas një sulmi me armë në një xhami në San Diego të Kalifornisë, në një ngjarje që autoritetet amerikane po e hetojnë si krim urrejtjeje. Dy autorët e dyshuar, adoleshentë të moshës 17 dhe 18 vjeç, u gjetën më pas të vdekur nga plagë të vetëshkaktuara me armë zjarri.

Sipas policisë, sulmi ndodhi mëngjesin e së hënës në Qendrën Islamike të San Diegos, ndërsa oficerët po hetonin paralelisht një telefonatë për një adoleshent që dyshohej se kishte tentuar të kryente vetëvrasje dhe ishte larguar nga shtëpia.

Pak pas njoftimit për të shtënat, policia mbërriti në vendngjarje dhe gjeti tre viktima me plagë armësh jashtë ndërtesës së xhamisë. Vetëm disa minuta më vonë, autoritetet morën një tjetër telefonatë për të shtëna nga një automjet ndaj një projektuesi peizazhesh në një zonë aty pranë.

Gjatë kërkimeve, oficerët lokalizuan automjetin e të dyshuarve disa blloqe larg xhamisë, ku dy adoleshentët u gjetën të pajetë. Hetimet paraprake tregojnë se ata i kanë shkaktuar vetes plagët fatale.

Mes viktimave ishte edhe roja i sigurisë së qendrës islame, i cili sipas autoriteteve luajti një rol vendimtar në shmangien e një tragjedie edhe më të rëndë.

“Është e drejtë të thuhet se veprimet e tij ishin heroike. Pa dyshim, ai shpëtoi jetë sot”, deklaroi shefi i policisë së San Diegos, Scott Wahl, gjatë një konference për shtyp.

Autoritetet ende nuk kanë bërë publike identitetet e tre viktimave. Sipas mediave amerikane, roja i sigurisë ishte baba i tetë fëmijëve. /rtsh/