Shtyhet seanca konstituive, vazhdon të premten

Shtyhet sërish seanca konstituive, nuk ka dakordim për votimin e nënkryetarëve.

Seanca e Kuvendit të Kosovës është ndërprerë, siç tha kryetarja e Kuvendit, Albulena Haxhiu, për shkak të mungesës së dakordimit për mënyrën e votimit të nënkryetarëve.

Haxhiu tha se palët nuk kanë arritur marrëveshje lidhur me procedurën që duhet të ndiqet për votimin e nënkryetarëve të Kuvendit, raporton rtk.

Haxhiu i reagon Simiçit

Kryetarja e Kuvendit të Kosovës, Albulena Haxhiu, ka reaguar pas pauzës së seancës ndaj deklarimit të deputetit të komunitetit serb, Igor Simiç, lidhur me propozimin për nënkryetar të Kuvendit.

Simiç kishte deklaruar se 10 deputetë të komunitetit serb, në emër të “popullit serb”, kanë propozuar Slavko Simiçin për këtë pozitë.

Haxhiu e ka cilësuar këtë deklarim si të papranueshëm dhe në kundërshtim me Kushtetutën e Kosovës.

“Popull serb ka në Serbi, ndërsa Republika e Kosovës e ka popullin e Kosovës”, ka deklaruar Haxhiu.

Ajo i ka bërë thirrje Simiçit që ta tërheqë deklarimin dhe propozimin për nënkryetar ta bëjë në përputhje me Kushtetutën dhe Rregulloren e Kuvendit.

“Prandaj një deklarim i tillë është i papranueshëm dhe unë menjëherë ju ftoj që ta merrni fjalën dhe ta tërhiqni atë deklarim që është në kundërshtim me Kushtetutën”, ka thënë Haxhiu.