Kane: Këndimi i ‘Wonderwall’ ishte një nga momentet më të veçanta me Anglinë
Kapiteni i Anglisë, Harry Kane, ka thënë se momenti kur tifozët anglezë kënduan këngën ikonike ‘Wonderwall’ pas fitores ndaj Kroacisë ishte një nga më të veçantët në karrierën e tij me Kombëtaren.
Anglia e nisi në mënyrë spektakolare Kupën e Botës 2026, duke mposhtur Kroacinë me rezultat 4:2 në Dallas dhe duke marrë kryesimin e Grupit L.
Pas ndeshjes, futbollistët anglezë u bashkuan me tifozët në stadium në interpretimin e hitit të grupit Oasis, me Anthony Gordon, Jude Bellingham dhe Harry Kane që u panë të emocionuar gjatë festës.
“Ky ishte një nga momentet e mia të preferuara ndonjëherë me fanellën e Anglisë, veçanërisht në një turne madhor”, tha Kane.
“E dimë se është vetëm ndeshja e parë dhe nuk po e teprojmë me entuziazmin, por lidhja emocionale me tifozët ishte e jashtëzakonshme. Ata e dinë sa shumë do të thotë kjo për ne, ashtu siç ne e dimë sa shumë do të thotë për ta”, theksoi ai.
Sulmuesi anglez shtoi se atmosfera e krijuar në stadium e bëri atë moment të paharrueshëm.
“Të gjithë i dinin fjalët e këngës. Ishte një moment vërtet i veçantë. Për një ndeshje hapëse, të kesh një mbështetje të tillë është fantastike. E dimë se edhe tifozët në shtëpi po festonin po aq shumë”, u shpreh Kane.
Anglia do të synojë të vazhdojë formën pozitive në ndeshjen e radhës kundër Ganës, ndërsa synon të shkojë sa më larg në Botërorin 2026.