Autogoli i Mukiele e shpëton Liverpoolit ndaj Sunderlandit në “Anfield”

Liverpool ka shmangur humbjen në minutat e fundit falë një autogoli të Nordi Mukiele, duke barazuar 1-1 me Sunderlandin në Anfield – rezultati i parë i barabartë për “Reds” në të gjitha garat këtë sezon, shkruan Rekordi.net.

Skuadra e Arne Slot hyri në ndeshje me synimin për të evituar dy humbje radhazi para tifozëve të vet për herë të parë që nga viti 2012.

Liverpool e nisi fuqishëm takimin, me Dominik Szoboszlai dhe Florian Wirtz që testuan portierin Robin Roefs, ndërsa Cody Gakpo ishte ndër më aktivët në aksionet sulmuese.

Sunderland u rrit gradualisht në lojë dhe erdhi pranë golit rreth gjysmës së parë, kur Trai Hume goditi fuqishëm, por Alisson e devijoi topin në traversë. Në anën tjetër, pak para pushimit, Alexis Mac Allister goditi shtyllën me kokë pas një harkimi nga Joe Gomez.

Liverpooli nuk po arrinte të gjente golin në pjesën e parë për herë të katërt radhazi në Premier League, duke e detyruar Slotin të aktivizojë Mohamed Salahun në fillim të pjesës së dytë. Megjithatë, edhe pas rritjes së presionit, Sunderland mbeti një kërcënim serioz.

Goli i epërsisë për mysafirët erdhi mbi 20 minuta para fundit, kur Chemsdine Talbi përfitoi nga një gabim i Virgil van Dijk dhe goditja e tij e devijuar përfundoi në rrjetë. Sunderland mbrojti me disiplinë pas golit, por nuk arriti të ruajë avantazhin deri në fund.

Në minutën e 81-të, Florian Wirtz krijoi hapësirë në zonë dhe gjuajtja e tij u devijua fuqishëm nga Mukiele, duke përfunduar në portë për 1-1.

Në fund, Liverpool u hodh në sulm për të gjetur fitoren, por një kundërsulm i shpejtë i Wilson Isidor u ndal në vijën fatale nga Federico Chiesa.

Sunderland largohet i zhgënjyer që nuk arriti fitoren e parë në “Anfield” që nga viti 1983, ndërsa Liverpool mbetet me shumë pikëpyetje dhe punë për të bërë në vijim të sezonit. /Rekordi.net