Abdixhiku pret në takim ambasadorin gjerman, diskutojnë për situatën politike pas refuzimit të kandidatit për president

Kryetari i Lidhjes Demokratike të Kosovës (LDK), Lumir Abdixhiku, ka pritur sot në takim ambasadorin e Gjermanisë në Kosovë, Rainer Rudolph.

Gjatë takimit, Abdixhiku dhe ambasadori Rudolph kanë diskutuar për zhvillimet aktuale politike në vend, me theks të veçantë në situatën e krijuar pas refuzimit të propozimit për presidentin e Republikës së Kosovës.

Abdixhiku ka vlerësuar se refuzimi i kandidatit të propozuar nga LDK-ja për president dhe pamundësia për ta përmbyllur këtë proces institucional përbëjnë një zhvillim të pafavorshëm për stabilitetin politik dhe funksionimin e institucioneve demokratike të vendit.

Abdixhiku po ashtu ka theksuar se përkrahja e partnerëve strategjikë të Kosovës është e një rëndësie të veçantë për ruajtjen e stabilitetit institucional, konsolidimin demokratik të vendit dhe avancimin e agjendës së saj euroatlantike.

Në takim është vlerësuar gjithashtu rëndësia e marrëdhënieve të ngushta ndërmjet Kosovës dhe Gjermanisë, si dhe bashkëpunimi i vazhdueshëm në proceset që lidhen me zhvillimin demokratik dhe integrimin evropian të Kosovës.

Në fund të takimit, Abdixhiku ka shprehur mirënjohjen e tij për mbështetjen e vazhdueshme dhe të palëkundur që Gjermania i ka dhënë Kosovës ndër vite, duke vlerësuar lart rolin e saj si një prej partnerëve më të rëndësishëm strategjikë të vendit.