Begaj dekreton Edi Ramën si Kryeministër, e mandaton për formimin e qeverisë dhe Ministrinë AI të “Diellës”

Presidenti Bajram Begaj ka dekretuar Edi Ramën si Kryeministër, duke e mandatuar për formimin e qeverisë së re.

Rama mbërriti në Presidencë mesditën e sotme (12 shtator). Në dekretin e tij, presidenti Begaj i dha kryeqeveritarit edhe përgjegjësinë për ngritjen e Ministrisë së parë virtuale të Shtetit të krijuar nga Inteligjenca Artificiale (AI) “Diella”.

“Diella” është risi në politikë dhe do të merret me prokurimet publike, për ta bërë procesin e tenderimit “të pakorruptueshëm”, tha një ditë më parë kryeministri Rama gjatë prezantimit të kabinetit të ri.

Me mandatimin e Kryeministrit, Presidenti do të nxjerrë dekretet individuale për secilin nga ministrat. Më pas, pas seancës së votëbesimit në Parlament, në ditët e ardhshme do të zhvillohet ceremonia e betimit të qeverisë.

Qeveria u bë publike një ditë më parë gjatë Asamblesë së PS-së. Përbërja e saj ka pësuar ndryshime të rëndësishme, me disa rikonfirmime, largime nga postet ministrore, si dhe emra të rinj. Për herë të parë në historinë e vendit, Ministria e Brendshme do të drejtohet nga në grua, Albana Koçiu. Ndërkohë, Turizmi dhe Sporti do të bashkohen në një ministri me Kulturën, ndërsa Mjedisi është ndarë si ministri më vete.

Përbërja e qeverisë së re “Rama 4”

1. Zëvendëskryeministre dhe Ministre të Infrastrukturës dhe Energjisë – Rikonfirmohet Belinda Balluku
2. Ministre e Shtetit me Inteligjencë Artificiale, “Diella” për prokurimet publike
3. Ministria e Brendshme – Albana Koçiu
4. Ministria për Evropën dhe Punët e Jashtme – Elisa Spiropali
5. Ministria e Financave – Rikonfimohet Petrit Malaj
6. Ministria e Mjedisit – Sofjan Jaupaj
7. Ministria e Turizmit, Kulturës dhe Sportit –  Blendi Gonxhja
8. Ministria e Arsimit – Mirela Kumbaro
9. Ministria e Shëndetësisë – Evis Sala
10. Ministria e Ekonomisë dhe Inovacionit – Delina Ibrahimaj
11. Ministria e Drejtësisë – Besfort Lamallari
12. Ministria e Mbrojtjes – Rikonfirmohet Pirro Vengu
13. Ministria e Bujqësisë dhe Zhvillimit Rural – Andis Salla
14. Ministri i Shtetit për Pushtetin Vendor – Ervin Demo
15. Ministre e Shtetit dhe Kryenegociatore me BE – Rikonfirmohet Majlinda Dhuka
16. Ministre e Shtetit për Administratën Publike dhe Antikorrupsionin – Rikonfirmohet Adea Pirdeni
17. Ministri i Shtetit për Marrëdhëniet me Parlamentin – Toni Gogu /rtsh/