Çfarë fitoi Izraeli nga sulmi dhe sa afër bombës atomike ishte Irani?

Natën e 12-13 qershorit, Izraeli nisi një sulm masiv në vendet e lidhura me programin bërthamor iranian, shkruan gazeta italiane ”Corriere della Sera”.

lLe të analizojmë situatën dhe pasojat e këtij konflikti.

Ku dhe sa efektiv ishte sulmi?

Veprimi kryesor përfshinte stacionin e Natanzit, i përbërë nga tre ndërtesa nëntokësore dhe i vendosur rreth 220 kilometra në juglindje të kryeqytetit.

Sipas Teheranit, stacioni raportoi dëme “në sipërfaqe”, ndërsa burimet izraelite thonë se ata goditën edhe nëntokë, ku ndodhen shumë pajisje.

Bastisje të tjera shënjestruan objekte në Tabriz, Arak, Fordow dhe ndoshta në kryeqytet. Zëdhënësja e ushtrisë izraelite (IDF), Effie Defrin, konfirmoi gjithashtu sulmin në qendrën e pasurimit të uraniumit në Isfahan, në Iranin qendror.

Jo më pak se shtatë shkencëtarë, figura kyçe në kryerjen e kërkimeve, u vranë. Megjithatë, duhet kohë për të vlerësuar ndikimin global, ofensiva sapo ka filluar dhe shteti hebre ka njoftuar tashmë se do të vazhdojë për ditë të tëra.

Cilat ishin objektivat e tjera të IDF-së?

IDF në sulmin e saj piketoi gjashtë baza, stacione raketash dhe radarësh, infrastrukturë, pajisje kundërajrore si dhe rezidencat e vendosura në dy komplekse të menaxhuara nga ushtria dhe disa ndërtesa ku jetonin studiues ose oficerë.

Rreth njëzet zyrtarë të lartë u eliminuan nga sulmet në një përpjekje për të çartikuluar udhëheqjen dhe për ta bërë më të vështirë hakmarrjen kundër shtetit hebre.

Sa afër ishin iranianët me bombën atomike?

Raporti i publikuar javën e kaluar nga Agjencia Ndërkombëtare e Energjisë Atomike thekson “mungesën e përgjithshme të bashkëpunimit” të Republikës Islamike dhe përsërit se vendi i ajatollahëve ka mjaftueshëm uranium të pasuruar në pastërti 60% për të qenë në gjendje të ndërtojë nëntë bomba atomike.

“Ekziston një ndryshim midis materialit dhe pajisjes. Nga pikëpamja e materialit, ata janë shumë të përparuar: ata tashmë e kanë atë. Në vitet e fundit ata kanë grumbulluar mjaftueshëm. Por për të pasur një armë bërthamore, ka teknologji të tjera për t’u marrë në konsideratë: jo e pamundur për iranianët. Ata vetë kanë deklaruar: Ne i kemi të gjitha pjesët e enigmës”, thekson Raphael Grossi, drejtor i përgjithshëm IAEA.

Për herë të parë në njëzet vjet, IAEA ka akuzuar zyrtarisht Republikën Islamike për shkelje të angazhimeve të saj mbi energjinë bërthamore.

Cili ishte paralajmërimi i IAEA-s? A ekziston rreziku i rrezatimit tani?

Në takimin në Vjenë, bordi i drejtorëve të mbikëqyrësit botëror bërthamor miratoi një rezolutë që denonconte “dështimet e shumta” të Teheranit për të dhënë përgjigje të plota mbi aktivitetet e tij bërthamore.

Nga 35 vendet anëtare, 19 votuan pro, me mbështetjen e Shteteve të Bashkuara, Mbretërisë së Bashkuar, Francës dhe Gjermanisë.

Raporti përmban një fjali kyçe që përforcon bindjet e qeverisë izraelite, e cila gjithmonë ka qenë e sigurt se e vetmja mënyrë për të ndaluar ajatollahët është përmes luftës:

IAEA deklaron se nuk mund të garantojë që programi bërthamor iranian është ekskluzivisht paqësor.

Mbrëmë, pas bastisjeve të IDF, drejtori i IAEA Grossi tha se “niveli i aktivitetit radioaktiv pas sulmit mbeti i pandryshuar, duke treguar mungesën e ndikimit të jashtëm radiologjik mbi popullsinë ose mjedisin”, por ai kishte prodhuar “kontaminim radiologjik dhe kimik brenda objekteve”.  /ATSH/