Rama ndan pamjet panoramike nga rruga Shëngjin-Velipojë: Është Shqipëria

Rruga Shëngjin-Velipojë është kthyer tashmë një nga akset më panoramike të vendit me potencial për zhvillimin e turizmit.

Kryeministri Edi Rama ndau sot në rrjetet sociale pamje panoramike me perëndimin e diellit nga rruga e re e cila lidh dy zonat bregdetare Shëngjin dhe Velipojë.

“Është Shqipëria, rruga Shëngjin-Velipojë”, shkruan kreu i qeverisë në rrjetet sociale.

Rruga Shëngjin – Velipojë konsiderohet një aks i rëndësishëm dhe me hapjen e tij do të krijohet një bosht i ri në një zonë me potencial shumë të madh zhvillimi turistik.

Nga Porti i Shëngjinit rruga i ngjitet shpatit me një lartësi 100-120 metra mbi nivelin e detit dhe ruan të paprekur plazhin e Shëngjinit, Ranën e Hedhun dhe plazhet e tjera të zonës. Më pas lidhet me infrastrukturën e Velipojës. Kjo rrugë do të bëjë lidhjen e dy qendrave kryesore turistike.

Përmirësimi i infrastrukturës rrugore ekzistuese si dhe ndërtimi i rrugëve të reja, që lidhin më shpejt qytetet me zonat turistike bregdetare, janë prioritete të punës së qeverisë. /atsh/