Ancelotti pas humbjes nga Barça: Jemi të trishtuar

I zhgënjyer nga lojtarët e tij pas humbjes ndaj Barcelonës në finalen e Superkupës së Spanjës (5-2), trajneri i Real Madridit, Carlo Ancelotti, megjithatë vlerësoi performancën e Kylian Mbappe, i cili shënoi golin e parë të ndeshjes.

“A ka diçka pozitive nga kjo ndeshje? Asgjë, përveç paraqitjes së Mbappe. Ai luajti shumë mirë, bëri disa lëvizje të shkëlqyera dhe shënoi një gol. Për pjesën tjetër duhet ta harrojmë dhe të shikojmë përpara,” tha Ancelotti pas ndeshjes.

“Duhet të përballemi me realitetin. Nuk u mbrojtëm mirë, ata shënuan shumë lehtë dhe nuk ishim në gjendje të funksiononim as kolektivisht, as individualisht, sepse humbëm shumë duele. Por ky është futbolli. Jemi të trishtuar dhe të zhgënjyer. Gjithsesi, duhet të shikojmë nga e ardhmja, sepse na presin sfida të tjera”, shtoi trajneri italian.

“Ne mund të humbim ndeshje, por jo në mënyrën se si luajtëm në pjesën e parë. Mendova se pas përjashtimit të Szczesny mund të ktheheshim në lojë, por edhe me epërsinë numerike nuk arritëm të gjenim zgjidhje”, përfundoi Ancelotti.