Irani refuzon thirrjet për kompromis dhe zotohet të ndëshkojë Izraelin

Irani nuk do të bëjë kompromis në hakmarrjen e tij të planifikuar kundër Izraelit pas sulmin vdekjeprurës ndaj liderit të Hamasit në Teheran.

“Për sa i përket shkeljes së integritetit tonë territorial, ne nuk do të bëjmë asnjë kompromis”, tha sot zëdhënësi i Ministrisë së Jashtme, Naser Kanaani.

“Megjithëse Irani nuk dëshiron një përshkallëzim të konfliktit në rajon, por do të ndëshkojë Izraelin për vrasjen e Ismail Haniyeh, pavarësisht përpjekjeve për ndërmjetësim”, tha zëdhënësi, sipas agjencisë së lajmeve ISNA.

Haniyeh, i cili udhëhoqi organizatën islamike palestineze Hamas, u vra në Teheran javën e kaluar.

Përshkallëzimi i fundit rrjedh nga lufta gati 10-mujore që Izraeli po zhvillon kundër Hamasit në Gazë – e shkaktuar nga masakra e 7 tetorit të vitit të kaluar, në Izraelin jugor.

Militantët e Hamasit dhe grupet e tjera vranë 1200 njerëz dhe rrëmbyen 250 të tjerë si pengje.

Izraeli synon të shkaterrojë Hamasin si një organizatë ushtarake dhe politike.

Sipas të dhënave nga Ministria e Shëndetësisë e Gazës, më shumë se 39 000 njerëz janë vrarë dhe më shumë se 90 000 janë plagosur në brezin bregdetar që nga fillimi i luftës.

Për shkak të numrit të lartë të viktimave civile, Izraeli është kritikuar nga autoritetet ndërkombëtare.

Negociatat indirekte midis Izraelit dhe Hamasit për një armëpushim dhe lirimin e pengjeve janë bllokuar prej disa muajsh. /atsh/