Barcelona në çerekfinale të Kupës së Mbretit, mposht me vështirësi Racing Santanderin

FC Barcelona ka siguruar kualifikimin në çerekfinalet e Kupës së Mbretit, pasi ka triumfuar me rezultat 2-0 ndaj skuadrës së divizionit të dytë, Racing Santander.

Ndeshja nuk nisi në orarin e parashikuar, pasi organizatorët njoftuan se dyert e stadiumit u hapën me vonesë, duke bërë që fillimi i takimit të shtyhej për rreth 15 minuta.

Pas nisjes së vonuar, skuadra katalanase mori kontrollin e lojës dhe krijoi disa raste të rrezikshme, por konkretizimi erdhi vetëm nga Ferran Torres, i cili realizoi golin e parë të ndeshjes.

Racing Santander ishte pranë barazimit në minutat shtesë, kur Lozano pati një rast të artë për të barazuar shifrat, por portieri i Barcelonës, Joan Garcia, u tregua vendimtar me një pritje spektakolare.

Në minutën e 90+5, talenti Lamine Yamal vulosi fitoren e Barcelonës, duke shënuar golin e dytë dhe duke i dhënë fund shpresave të skuadrës vendase.

Me këtë fitore, Barcelona vazhdon rrugëtimin drejt trofeut të Kupës së Mbretit, ndërsa Racing Santander, pavarësisht paraqitjes dinjitoze dhe rezistencës së treguar, nuk arriti të realizojë befasinë ndaj një ekipi të elitës së futbollit spanjoll.