Liverpool rikthehet te fitorja, mposht Aston Villan

Liverpool ka marrë një fitore të rëndësishme me rezultat 2-0 ndaj Aston Villës, duke i dhënë fund serisë prej pesë humbjeve radhazi në garat vendore dhe duke regjistruar triumfin e parë në Premier League që nga shtatori, raporton Rekordi.net.

Sfida u zhvillua në “Anfield”, ku skuadra e Arne Slot kërkonte të rikthente besimin pas një periudhe të vështirë. Villa rrezikoi e para, kur Morgan Rogers goditi shtyllën pas një kombinimi të bukur me Ollie Watkins. Në anën tjetër, Dominik Szoboszlai dhe Andrew Robertson patën raste të mira, por nuk arritën të mposhtin portierin Emiliano Martinez.

Gjatë pjesës së parë, portieri Giorgi Mamardashvili u shfaq vendimtar për vendasit me disa pritje të rëndësishme, përfshirë një devijim spektakolar të gjuajtjes së Matty Cash.

Liverpooli arriti të zhbllokojë rezultatin në minutat shtesë të pjesës së parë, kur presioni i lartë i detyroi mysafirët të gabojnë dhe Mohamed Salah shënoi me këmbën e majtë, duke arritur kuotën e 250 golave me fanellën e “Reds”.

Në pjesën e dytë, Aston Villa filloi më mirë, por Liverpooli i dyfishoi shifrat në minutën e 59-të. Pas një tjetër presioni të suksesshëm, Alexis Mac Allister asistoi për Ryan Gravenberch, goditja e të cilit u devijua dhe përfundoi në rrjetë.

Në minutat e fundit, Villa tentoi të rikthehej në lojë, por Ross Barkley humbi një rast të artë nga afërsia. Në fund, Liverpool arriti ta mbyllë ndeshjen pa pësuar gol dhe të rikthehet te fitorja pas më shumë se një muaji.

Kjo fitore e ngjit skuadrën e Arne Slot në pjesën e sipërme të tabelës, ndërsa Aston Villa pëson humbjen e parë në ligë që nga gushti. /rekordi.net