Dhjetëra mijëra njerëz protestojnë në Berlin kundër mbështetjes gjermane për gjenocidin e Izraelit në Gazë

Dhjetëra mijëra njerëz u mblodhën sot në Berlin për të protestuar kundër mbështetjes së Gjermanisë për atë që ata e cilësuan si gjenocid nga Izraeli në Rripin e Gazës.

Demonstrata masive, e titulluar “Të gjithë sytë nga Gaza – Ndalni gjenocidin”, u organizua nga një koalicion i gjerë prej rreth 50 grupesh, përfshirë organizata pro-palestineze, Medico International, Amnesty International dhe Partinë e Majtë të opozitës.

Organizatorët e protestës bënë thirrje për “dhënien fund të bashkëpunimit gjerman” në luftën gjenocidiale të Izraelit në enklavën palestineze, duke kërkuar ndalimin e menjëhershëm të eksporteve të armëve gjermane drejt Izraelit, qasje për ndihma humanitare në Gaza dhe vendosjen e sanksioneve të BE-së kundër Izraelit.

Ata theksuan se veprimet e qeverisë izraelite janë cilësuar prej kohësh si gjenocid nga ekspertë dhe organizata ndërkombëtare, ndërsa Gjykata Ndërkombëtare e Drejtësisë (ICJ) po i heton si të tilla.

“Në kohën kur të gjithë mund të shohin se si ushtria izraelite po kryen mizori masive në Gaza, qeveria gjermane mohon dhunën sistematike,” thuhet në një deklaratë të organizatorëve.

Sipas vlerësimeve paraprake të policisë, rreth 18,000 njerëz u mblodhën para bashkisë së Berlinit për të marrë pjesë në këtë demonstratë të madhe. Më herët gjatë ditës, mijëra të tjerë kishin protestuar gjithashtu në Berlin kundër luftës së Izraelit në Rripin e Gazës.

Kryetarja e Partisë së Majtë, Ines Schwerdtner, iu drejtua turmës duke folur për gjenocidin në Gaza dhe bashkëfajësinë e qeverisë gjermane. “Kancelari (Friedrich Merz) dhe ministrat flasin, por nuk veprojnë. Ata flasin për ‘arsye shtetërore’, ndërsa spitalet kthehen në gërmadha. Ata heshtin për gjenocidin – dhe janë bashkëfajtorë,” deklaroi ajo, raporton RTSH.