24 orët e fundit: Arrestime për mashtrim, ryshfet zgjedhor e tentim-vrasje

Policia e Kosovës ka raportuar për një sërë incidentesh kriminale të regjistruara gjatë 24 orëve të fundit në rajone të ndryshme të vendit, ku janë arrestuar disa persona të dyshuar për vepra të ndryshme penale.

Në rajonin e Prishtinës, është arrestuar një shtetas i huaj lidhur me një rast mashtrimi të ndodhur në Gllogoc në vitin 2005. Pas intervistimit, i dyshuari është dërguar në mbajtje me vendim të prokurorit.

Po ashtu, në Fushë Kosovë është raportuar një rast i dhunës në familje, ku një shtetase e huaj ka deklaruar se është sulmuar fizikisht pas një mosmarrëveshjeje nga një mashkull kosovar. I dyshuari është intervistuar dhe rasti vazhdon të trajtohet në procedurë të rregullt.

Në Graçanicë, policia ka arrestuar një person të dyshuar për dhënie ose marrje ryshfeti në lidhje me votimin. Gjatë kontrollit në shtëpinë e tij janë sekuestruar materiale votimi dhe katër telefona mobilë. I dyshuari është dërguar në mbajtje.

Ndërkaq, në Prishtinë është arrestuar një person nën dyshimin për keqpërdorim dhe mashtrim me prokurim publik si dhe falsifikim dokumentesh. Sipas hetimeve fillestare, ai dyshohet se ka paraqitur dokumente të falsifikuara gjatë një procesi ofertimi me qëllim përfitimi ekonomik.

Rasti më i rëndë i raportuar gjatë kësaj periudhe ka ndodhur në Gjilan, ku një person është arrestuar për tentim-vrasje. Viktima, një mashkull kosovar, ka pësuar lëndime dhe është dërguar për trajtim mjekësor në Qendrën Emergjente në Gjilan, ndërsa i dyshuari është dërguar në mbajtje.

Në Ferizaj, policia ka arrestuar një person që mbante pa autorizim një thikë, ndërsa në një rast tjetër është arrestuar një i dyshuar pasi gjatë kontrollit iu gjet një sasi e vogël marihuane. Gjithashtu, një person tjetër është dërguar në mbajtje lidhur me një rast posedimi të paautorizuar të narkotikëve të raportuar një ditë më parë.

Në Suharekë është hapur hetim për falsifikim të parasë, pasi një qytetar ka raportuar pranimin e monedhave metalike që dyshohet se janë të falsifikuara. Paratë janë sekuestruar dhe rasti po hetohet nga njësitë përkatëse.

Ndërkohë, në rajonin e Mitrovicës Veriore janë raportuar dy raste kanosjeje. Në Mitrovicë të Veriut një person është arrestuar pasi dyshohet se, nën ndikimin e alkoolit, ka kanosur një grua. Në Leposaviq, një tjetër rast kanosjeje është proceduar në procedurë të rregullt pas intervistimit të të dyshuarit, raporton rtk.

Sipas raportit policor, në rajonet e Pejës, Gjakovës dhe Mitrovicës së Jugut nuk është raportuar asnjë incident me rëndësi gjatë periudhës raportuese.