Zelensky ndihet i tradhtuar nga Trump për aksesin në Starlink
Presidenti i Ukrainës, Volodymyr Zelensky, ka deklaruar se ndihet personalisht i tradhtuar nga presidenti amerikan, Donald Trump, pas raportimeve për kufizimin e qasjes së ushtrisë ukrainase në sistemin satelitor Starlink, në pronësi të kompanisë SpaceX të Elon Musk. Gjatë një vizite në Londër, kreu i shtetit ukrainas shprehu shqetësimin për të ardhmen e marrëdhënieve me Uashingtonin, në një kohë kur mbështetja amerikane mbetet thelbësore për mbrojtjen e Ukrainës nga agresioni rus.
I pyetur në një intervistë televizive nëse ndihej i tradhtuar nga Trump, Zelensky u përgjigj pozitivisht, duke theksuar se situata ishte më e ndërlikuar sesa emocionet personale. “Është për të ardhur keq që po humbasim një partner të fortë”, deklaroi presidenti ukrainas.
Sipas raportimeve, ushtria ukrainase hasi probleme me funksionimin e sistemit Starlink, pasi shpejtësia e tij u kufizua për pajisjet që lëviznin me më shumë se 160 kilometra në orë. Kufizimi ndikoi në përdorimin e dronëve ukrainas, të cilët mbështeten te lidhja satelitore për komunikim dhe operacione në distancë. Problemet ngritën gjithashtu shqetësime për aftësinë e Ukrainës për t’u mbrojtur nga sulmet ajrore ruse. Zelensky pretendoi se autoritetet amerikane ishin në dijeni të vendimit dhe paralajmëroi për pasojat e mundshme. “Ky vendim do të sjellë shumë humbje njerëzore… sigurisht, njerëzit do të vdesin”, u shpreh ai.
Ndërprerja e raportuar e komunikimeve satelitore ndodhi në një moment delikat për Ukrainën, ndërsa Rusia vijonte sulmet me raketa balistike. Sipas materialit të raportuar, Kievi nuk kishte marrë paralajmërimet e zakonshme amerikane për sulmet e mundshme për dy net radhazi. Trump mohoi se administrata e tij kishte ndërprerë shkëmbimin e informacionit të inteligjencës me Ukrainën. /rtsh/