Spektakël në Mynih, Arsenali barazon në një finish dramatik, të gjitha rezultatet

Arsenali ka marrë një barazim të rëndësishëm 2-2 në udhëtim ndaj Bayern Munichut, në një përballje spektakolare të Ligës së Kampionëve, të zhvilluar në “Allianz Arena”.

Skuadra londineze arriti të shmangte humbjen falë një goli të vonshëm të Declan Rice, duke e vazhduar serinë pozitive në garën më prestigjioze evropiane për klube.

Ndeshja nisi me një goditje për Arsenalin, pasi Bukayo Saka u detyrua të largohej nga fusha për shkak të lëndimit që në minutën e dhjetë. Megjithatë, ndryshimet taktike të trajnerit Mikel Arteta dhanë rezultat dhe mysafirët kaluan në epërsi.

Në minutën e 22-të, Eberechi Eze shfrytëzoi një pasim të bukur të Martin Odegaardit dhe realizoi me volej, duke e dërguar topin në këndin e poshtëm të portës së Manuel Neuerit.

Bayerni reagoi para përfundimit të pjesës së parë. Pas një aksioni të ndërtuar bukur dhe një pasimi të shkëlqyer nga Harry Kane, Alphonso Davies u gjend në pozitë të mirë dhe shënoi për 1-1.

Në pjesën e dytë, të dyja skuadrat krijuan raste të shumta, ndërsa portierët Neuer dhe David Raya u dalluan me pritje vendimtare.

Bayerni arriti të përmbyste rezultatin në minutën e 67-të, kur Harry Kane u tregua i saktë nga pika e bardhë e penalltisë, pasi Jurrien Timber ndali me dorë një top që po shkonte drejt portës. Sulmuesi anglez nuk gaboi dhe shënoi për 2-1.

Kur dukej se gjermanët do ta siguronin fitoren, Arsenali reagoi në minutat e fundit. Viktor Gyokeres, i futur në lojë nga banka rezervë, asistoi për Declan Rice, i cili në minutën e 89-të realizoi një gol të bukur, duke e vendosur rezultatin përfundimtar 2-2.

Ky barazim i lë të dyja skuadrat me arsye për të vazhduar garën me optimizëm. Bayerni ruan serinë mbresëlënëse pa humbje në shtëpi në fazën e grupeve dhe atë të ligës në Ligën e Kampionëve, ndërsa Arsenali vazhdon të jetë i pamposhtur në këtë edicion të garës, me dy fitore dhe një barazim.

Për londinezët, goli i Rice në fund ishte shpëtim, ndërsa Bayerni mund të pendohet për rastet e humbura dhe pamundësinë për ta ruajtur epërsinë deri në vërshëllimën përfundimtare. /Rekordi.net

Të gjitha rezultatet: