Sekuestrohen 37 kilogramë substancë e dyshuar narkotike, arrestohen pesë persona

Prokuroria Speciale, në bashkëpunim me Policinë e Kosovës dhe Agjencinë Kosovare të Inteligjencës (AKI), ka zhvilluar mbrëmë një operacion kundër trafikimit të narkotikëve, gjatë të cilit janë arrestuar pesë persona dhe janë sekuestruar 37 kilogramë substancë e dyshuar narkotike, me vlerë të përafërt prej 550 mijë eurosh.

Prokurori i rastit, Atdhe Dema, në një konferencë për media ka bërë të ditur se operacioni është rezultat i koordinimit ndërmjet tri institucioneve dhe se të arrestuarit dyshohen se janë pjesë e një grupi të organizuar kriminal, të përfshirë në blerjen dhe shpërndarjen e narkotikëve.

Ai ka thënë se dyshimet fillestare janë se substanca e sekuestruar është heroinë, ndërsa lloji dhe sasia e saktë do të konfirmohen pas analizave dhe verifikimeve përkatëse.

Pesë të dyshuarve u është caktuar masa e ndalimit prej 48 orësh, ndërsa Prokuroria Speciale është duke përgatitur dokumentacionin për vazhdimin e procedurave penale, raporton rtk.

Ushtruesi i detyrës së kryeprokurorit të Prokurorisë Speciale ka deklaruar se lufta kundër krimit të organizuar dhe trafikimit të narkotikëve do të vazhdojë pa kompromis, duke kërkuar njëkohësisht kujdes në publikimin e informatave, pasi hetimet mund të vazhdojnë edhe në faza të tjera.