PSD-ja nuk garon në zgjedhje, Molliqaj tregon arsyet

Partia Socialdemokrate (PSD) ka njoftuar se nuk do të kandidojë ë zgjedhjet parlamentare të 9 shkurtit 2025. Lajmin e ka bërë me dije kryetari i kësaj partie, Dardan Molliqaj pas mbledhjes së Këshillit Drejtues.

“Ne do të jemi prezent në ambientin politik e elektoral që e pret Kosovës. Kësaj here jo përmes kandidaturës, por përmes aksionit dhe fjalës. Qartazi, alternatives politike që përfaqëson PSD-ja, nuk e ka mbështetjen e duhur për përfaqësim në Kuvend”, ka shkruar Molliqaj në “Facebook”.

Postimi i plotë i Molliqajt:

Të dielën, më 6 tetor, Partia Socialdemokrate ka mbajtur mbledhjen e rregullt të Këshillit Drejtues. Midis diskutimeve të situatës politike kemi vendosur edhe për hapat e ardhshëm të veprimit politik.

Ne do të jemi prezent në ambientin politik e elektoral që e pret Kosovës. Kësaj here jo përmes kandidaturës, por përmes aksionit dhe fjalës. Qartazi, alternatives politike që përfaqëson PSD-ja, nuk e ka mbështetjen e duhur për përfaqësim në Kuvend.

Kështu, kemi vendosur ta refuzojmë rrugën e dobët të koalicioneve ku bindjet do të na lakoheshin, por edhe fatin që na e paracakton probabiliteti që gjithsesi është brenda popullizmit të këtij momenti. Kosova rrezikohet prej popullizmit me prirje autoritare të partisë në pushtet.

Por përgjigja për këtë regjim politik e diskursiv nuk është “djali i mirë” e “normal” me higjienën e fjalorit politikisht korrekt.

Ky opsion, nën petkun e racionalitetit, edhe në Kosovë si gjithkund tjetër, përfaqëson pushtetet e kaluara ku ligjin e bënte kapitalizmi grabitqar.

Në vend të votës, duam të japim shembull aktivizmi. Shpresa që duam të ndërtojmë është kalitja që ta sjell veprimi yt, dhe jo faktorët nga jashtë.

Fluska e aktivitetit opozitar duhet të bëhet mësim. Kështu do të ndërtohet një trajektore tjetër, me notat e momentet e veta, edhe përtej edhe përkundër kohës e hapësirës së këtij pushteti.