Pengmarrje në një burg në Rusi, 8 viktima

Katër punonjës të burgjeve janë vrarë pasi të burgosurit organizuan një revoltë në një koloni penale ruse dhe morën pengje, thonë autoritetet federale.

Forcat speciale sulmuan objektin IK-19 Surovikino në rajonin jugperëndimor të Volgogradit pasi të burgosurit me thikë në dorë, të cilët e identifikuan veten si militantë të Shtetit Islamik (IS), pretenduan se kishin marrë kontrollin e kompleksit të gjerë.

Autoritetet thanë se operacioni i forcave speciale kishte liruar disa pengje dhe “neutralizoi” të gjithë sulmuesit. Më vonë konfirmuan se katër punonjës të burgut kishin vdekur.

Një imazh i paverifikuar i postuar në mediat sociale duket se tregon një të burgosur që mbante një thikë duke qëndruar mbi një roje burgu të gjakosur gjatë revoltës.

Garda Kombëtare e Rusisë Rosgvardia tha se snajperët qëlluan katër sulmues në operacionin e shpëtimit. Trupat e armatosur rëndë u filmuan duke mbërritur në burg në pamjet e postuara në aplikacionin e mesazheve Telegram nga Garda Kombëtare.

Sulmi filloi gjatë një takimi të komisionit disiplinor, tha në një deklaratë Shërbimi Federal i Ndëshkimit të Rusisë (FSIN). Sulmuesit thuhet se kanë prerë rojet dhe kanë plagosur disa punonjës të burgut.

FSIN tha se tetë punonjës të burgut dhe katër të dënuar ishin marrë peng. Disa raporte në mediat ruse sugjeruan se drejtori dhe zëvendësdrejtori i burgut ishin midis atyre që u kapën.

“Kriminelët shkaktuan plagë me thikë në vende të ndryshme ndaj katër punonjësve, tre prej të cilëve vdiqën. Katër të tjerë që rezistuan u shtruan në spital, njëri prej të cilëve vdiq në spital.”

Mediat ruse i emëruan sulmuesit si Ramzidin Toshev, 28 vjeç, Rustamchon Navruzi, 23, Nazirchon Toshov, 28 dhe Temur Khusinov, 29 vjeç. Të gjithë ishin vendas nga Uzbekistani dhe Taxhikistani.

Në pamjet dramatike të telefonit celular të publikuar nga sulmuesit, ata e identifikuan veten si militantë të IS. Burrat thanë se ishin të motivuar nga dëshira për t’u hakmarrë për persekutimin e muslimanëve.

Videoja tregonte gjithashtu zyrtarët e burgut të shtrirë në pellgje gjaku, ndërsa në video të veçanta sulmuesit bredhin në oborrin e burgut.

Guvernatori rajonal i Volgogradit, Andrei Bocharov tha më parë se marrja e pengjeve nuk përbënte “asnjë kërcënim për popullsinë civile”.

Presidenti Vladimir Putin u filmua duke marrë pjesë në një takim virtual me shefat e sigurisë, gjatë të cilit Kremlini tha se ai ishte i informuar për situatën.

Pengmarrja në Volgograd është incidenti i dytë i tillë këtë verë, pasi gjashtë të burgosur që u zotuan për besnikëri ndaj grupit të Shtetit Islamik kapën dy roje në një strukturë në rajonin fqinj të Rostovit.

Pesë nga të burgosurit u vranë dhe një i gjashti u dënua me 20 vjet burg pas sulmit. Prokurorët thanë se kishin hapur një çështje në lidhje me një pengmarrje. IK-19 Surovikino është një koloni penale e sigurisë së lartë. Besohet se aty ka rreth 1200 të burgosur.

Tetë viktima

Ndërkaq Garda Kombëtare e Rusisë tha se snajperët e saj i kanë vrarë katër pengmarrësit në burgun e rajonit veriperëndimor Volgogard, pasi ata kryen një sulm vdekjeprurës ndaj rojeve dhe i morën peng disa pjesëtarë të stafit.

Shërbimi i Burgjeve të Rusisë (FSIN) tha në një komunikatë se katër roje burgu vdiqën të premten, pasi katër të burgosur i morën peng tetë roje dhe katër të burgosur të tjerë në burgun nr. 19 të sigurisë maksimale në qytetin Surovikino, në rajonin Volgogard.

“Ata u shkaktuan plagë të ndryshme me thikë katër punonjësve të burgut, tre prej të cilëve vdiqën si pasojë. Katër të tjerët, të cilët rezistuan, u dërguan në spital, njëri prej tyre vdiq në spital”, tha FSIN, duke shtuar se katër të burgosur të tjerë u plagosën gjatë krizës me pengje.

Mediat raportuan se disa njerëz vdiqën dhe se incidenti ndodhi kur një komision disiplinor u mblodh për një takim në këtë burg.

Kanalet në Telegram, të lidhur me shërbimin e burgjeve, publikuan një video që shfaq katër të burgosurit, të cilët e quajnë veten “luftëtarë të Shtetit Islamik”. Ata shihen me thika në duar duke qëndruar pranë tre trupave në uniformë të FSIN-it dhe pranë një personi tjetër të plagosur.

Në një video tjetër, një i burgosur thekson se rojet e burgut “i kanë shkelur të drejtat e myslimanëve”. Një i burgosur tjetër përmes një video i bën thirrje presidentit të Rusisë, Vladimir Putin, t’i plotësojë kërkesat e të burgosurve dhe thotë se ka nevojë për mjek. Putin tha në televizion se është njoftuar për këtë incident nga shefi i FSIN-it.

Një video i shfaq katër të burgosurit duke qëndruar pranë një baneri me një mbishkrim arab. Ata brohorisin “Allahu Akbar!” (“Zoti është më i madhi!”), teksa njëri prej tyre e mban një burrë pa uniformë.

BBC /rtsh