OKB: Situata në Gazë po përkeqësohet me shpejtësi

OKB-ja ka lëshuar paralajmërimin e rëndë për përkeqësimin e situatës humanitare në Rripin e Gazës, për shkak të përshkallëzimit të operacioneve ushtarake izraelite.

Zëdhënësi i OKB-së, Stephane Dujarric, në një konferencë për shtyp, deklaroi se paralajmërimet e mëparshme të organizatës për një katastrofë të mundshme në Gazë po materializohen, ndërsa situata po përkeqësohet me shpejtësi.

Dujarric theksoi se gjatë 48 orëve të fundit, ushtria izraelite ka goditur ndërtesa të larta banimi, duke lënë shumë familje pa shtëpi apo çadra.

Autoritetet izraelite kanë urdhëruar të gjithë banorët e qytetit të Gazës të zhvendosen drejt jugut të Rripit.

Kjo vjen vetëm dy javë pas konfirmimit të zisë së bukës në guvernatoratin e Gazës, çka e bën situatën edhe më kritike.

Sipas Zyrës për Koordinimin e Çështjeve Humanitare (OCHA), zhvendosja nga veriu i Gazës është praktikisht e pamundur për shumë njerëz.

Transporti për të lënë veriun mund të kushtojë deri në 1,000 dollarë, një shifër e papërballueshme për shumicën.

Rrugët janë pothuajse të pakalueshme, dhe vendet e zhvendosjes në jug janë tejmbushur, duke e bërë lëvizjen jashtëzakonisht të vështirë.

Sipas të dhënave të OKB-së, vetëm në dy ditët e fundit janë regjistruar 9,400 lëvizje nga veriu në jug, duke e çuar numrin total të zhvendosjeve që nga mesi i gushtit në afro 62,000 deri në orën 14:00 sipas kohës lokale.

Në total, zhvendosjet në të gjithë Rripin e Gazës kanë arritur në 110,000 që nga mesi i gushtit, përfshirë shumë lëvizje brenda vetë veriut.

Dujarric nënvizoi nevojën urgjente për ndërhyrje nga komuniteti ndërkombëtar, duke u bërë thirrje vendeve të veprojnë me vendosmëri për të parandaluar vuajtje të mëtejshme. Ai theksoi se kushtet aktuale, përfshirë mungesën e ushqimit, strehimit dhe sigurisë, po e çojnë Gazën drejt një katastrofe humanitare të paprecedentë. /rtsh/