Merkel kërkon bisedime të drejtpërdrejta me Rusin

Angela Merkel u ka bërë thirrje udhëheqësve të Bashkimit Evropian që të negociojnë drejtpërdrejt me Kremlinin për t’i dhënë fund luftës në Ukrainë, duke përjashtuar veten si e dërguar e mundshme.

Ish-kancelarja gjermane, e cila në vitin 2015 negocioi marrëveshjet Minsk II që dështuan të ndalonin konfliktin e nxitur nga Moska në Ukrainën juglindore, tha se vetëm udhëheqësit aktualë të BE-së do të merreshin seriozisht nga Vladimir Putin.

“Ajo që më vjen keq është se, sipas mendimit tim, Evropa nuk po e shfrytëzon mjaftueshëm potencialin e saj diplomatik”, u shpreh Merkel në një aktivitet në Berlin, duke theksuar se kanalet diplomatike duhet të mbahen të hapura dhe se “parandalimi ushtarak plus aktivitetet diplomatike” janë të domosdoshme.

Komentet e saj erdhën pas spekulimeve se Merkel mund të vepronte si e dërguar speciale e BE-së për paqen, por ajo i hodhi poshtë këto zëra.

Brukseli më parë kishte refuzuar Gerhard Schröderin, paraardhësin e saj si kancelar, si ndërmjetësues të mundshëm, pasi Putini e kishte sugjeruar.

Ndërkohë, përpjekjet diplomatike të SHBA-së për t’i dhënë fund luftës kanë rënë, ndërsa Rusia dhe Ukraina kanë intensifikuar sulmet ndaj infrastrukturës kritike.

Presidenti ukrainas Volodymyr Zelenskyy deklaroi se kishte diskutuar me presidentin e Këshillit Evropian António Costa mbi perspektivat e negociatave për paqen dhe rolin e Evropës në to, duke theksuar se duhet përcaktuar qartë kush do ta përfaqësojë BE-në.

Megjithatë, diplomatja e lartë e BE-së, Kaja Kallas, minimizoi mundësinë e bisedimeve të afërta, duke thënë se “nuk po ndodh asgjë realisht atje”.

Nga ana tjetër, zyrtarët rusë konfirmuan se nuk ka sinjale nga Ukraina për negociata, ndërsa nënvizuan se Moska është në kontakt të vazhdueshëm me Shtetet e Bashkuara për çështjen e Ukrainës. /rtsh/