Mërgimtari Hektor Beqiri realizoi mbi 100 vizita te krerët e UÇK-së në Hagë

Hektor Beqiri me prejardhje nga Drenica, por që jeton dhe vepron në Düsseldorf të Gjermanisë, është personi që më së shumti u ka bërë vizita krerëve të UÇK-së në Qendrën e Paraburgimit në Hagë.

Ai ka treguar se prej vitit 2004 Haga është vend i njohur për të. “Prej vitit 2004 Haga është vendi i njohur për mua.

Prej 4 vjet e gjysmë prej se krerët e UÇK-së janë këtu, i kam vizituar mbi 100 herë”, ka thënë Beqiri, raporton “Epoka e re”.

Në çdo protestë që është organizuar pranë kësaj qendre të paraburgimit, kundër padrejtësive që po u bëhen ish-krerëve të UÇK-së, Hektor Beqiri ka marrë pjesë.

Ai thotë se proces gjyqësor më të padrejtë se ky kundër ish-krerëve të UÇK-së nuk njeh historia e këtij qyteti, që ndryshe njihet si Shtëpia e Drejtësisë. “Dhomat e Specializuara janë padrejtësi speciale. Janë njollë e zezë edhe për vetë Hagën”, thotë mërgimtari Beqiri.

Ai tregon edhe momentet kur e përfundon vizitën me krerët e UÇK-së. “Është shumë vështirë kur i lë çlirimtarët tanë aty brenda”.

Por thotë se ata janë të fortë moralisht dhe beson në pafajësinë e tyre. “Besoj në pafajësinë e tyre, rri afër, i vizitojë, pra të paktën moralisht jam me ta. Ata moralisht janë të pathyeshëm”.

Padrejtësia ka dominuar këtu që katër vjet e gjysmë, thotë Beqiri.

“Sivjet duhet të triumfojë drejtësia! Shpresoj se në fund të vitit të mbarojë ky proces i stërzgjatur. Çlirimtarët, të lirë e krenarë, së shpejti kthehen në Kosovë. E vërteta e luftës së UÇK-së nuk lejojmë të deformohet dhe me të vërtetën e popullit tonë do ta fitojmë këtë betejë në Hagë”, ka thënë Beqiri.