Kurti: Akil dhe Nora, vëlla e motër, përgjithmonë jeni kampionët tanë olimpikë

Kryeministri Albin Kurti i ka falënderuar xhudistët Akil dhe Nora Gjakovën për përfaqësimin e tyre që i bënë Kosovës në Lojërat Olimpike “Paris 2024”.

Në një postim në Facebook, ai ka thënë se Akili dhe Nora do të jenë përgjithmonë kampionët olimpik.

“Akil Gjakova e humbi medaljen e bronztë për pak, e atë të argjendtë edhe për më pak. Mbase kjo është pasojë direkte e shpirtit të tij luftarak dhe dëshirës së madhe për fitore. Ndeshjen e parë e zhvilloi krah për krah, sepse njëkohësisht, me motrën e tij Norën. Përderisa Nora e përmbylli rrugëtimin e saj në Paris 2024, ai fitoi dhe me vazhdoi garat tutje duke mundur dy herë kundërshtarët të cilët ndodhen më lart se ai në ranglistën botërore”.

“U eliminua në gjysëmfinale nga numri 1 në botë, pasi që të gjithëve që ishim prezent në Champ-de-Mars Arena na u duk se fitoi me Ippon, por jo edhe referit në tatami. E në betejën e tij për medalje të bronztë, Thembra e Akilit ishte ajo pjesë e sekondës kur një lëvizje fort e qëlluar nuk përmbyllet plotësisht.  Përkundër kësaj, Akil dhe Nora, vëlla e motër, përgjithmonë jeni kampionët tanë Olimpik. Faleminderit për emocionet që na keni dhënë dhe për përkushtimin tuaj për vendin tonë”, ka thënë Kurti.