Kievi zotohet të shkatërrojë infrastrukturën ruse të mbrojtjes

Pas sulmit të fundit ajror fatal rus që Ukraina tha se vrau dy persona në afërsi të Kievit, Ukraina do të fokusohet në shkatërrimin e përhershëm të infrastrukturës ushtarake të Rusisë, tha sot kreu i zyrës presidenciale të Ukrainës, Andrii Yermak.

”Për të parandaluar vdekjen e civilëve, ishte e nevojshme t’i mohohej Rusisë aftësia për të vrarë”, tha Yermak në një deklaratë të postuar në Telegram që përfshinte një video që tregonte forcat e shpëtimit duke gërmuar nëpër rrënojat e një ndërtese të shkatërruar.

Yermak tha se një burrë dhe djali i tij 4-vjeçar u vranë kur shtëpia e tyre në një periferi të Kievit u godit nga një dron rus.

Autoritetet ukrainase kishin thënë më parë se ndërtesa e goditur të shtunën në mbrëmje ishte goditur nga fragmente raketash.

Nuk ishte e mundur të verifikoheshin në mënyrë të pavarur raportet nga zona e luftës.

”Është e nevojshme të shkatërrohet infrastruktura ushtarake (e Rusisë) sepse armiku nuk pranon argumente të tjera”, tha Yermak, duke shtuar se Ukraina shpreson për leje të shpejtë nga aleatët perëndimorë për të qenë në gjendje të përdorë raketa me rreze më të gjatë kundër territorit rus.