Jashari: Kompleksin Memorial `Adem Jashari` e kemi obligim ndaj qytetarëve

PërfaqësuesI i familjes Jashari, Bekim Jashari, në prezantimin e masterplanit të Kompleksit Memorial “Adem Jashari”, tha se ndërtimi i kompleksit memorial Adem Jashari është obligim ndaj qindra e mijëra vizitorëve anekënd trojeve shqiptare që vizitojnë Prekazin dhe kthehen të mbushur me krenari dhe se është hap i shumëpritur për të parandaluar dëmtimin edhe më të madh të kullave.

“Por vizitorët nuk e fshehin as dëshirën e madhe që të shohin një kompleks të konservuar, një muze funksional dhe modern dhe me hapësira më të mëdha për të kaluar kohë me familjet e tyre”, tha Jashari.

Jashari tha se gjithçka që ndodhi më 5, 6 dhe 7 mars 1998, sipas tij, është dëshmi e krimeve që ndodhën në Kosovë, nga regjimi serb mbi popullsinë civile, por edhe dëshmi, siç tha ai, e vendosmërisë, luftës, sakrificës dhe heroizmit që ndodhi anëkënd vendit.

“Jo vetëm Kompleksi Memorial “Adem Jashari” por edhe të gjitha të tjera memoriale të dëshmorëve dhe martirëve të lirisë, janë dëshmi e historisë sonë të lavdishme, sakrificës civile dhe heroizmit të burrave, grave, djemve e vajzave që edhe në moshë të re u vunë shërbim të vendit duke mos i kursyer as jetët e tyre”.

Bekik Jashari tha se duhet ta zhvillojmë një kompleks që të na njohë bota.

“Duke e ndërtuar këtë kompleks, le t’i tregojmë botës për historinë tonë të lavdishme, t’i dëshmojmë për luftën e drejt dhe jetën e re që kemi ndërtuar si një shoqëri demokratike, shembull për shtetet dhe shoqërinë në rajon. Të bashkohemi siç na kanë mësuar të parët tanë për ta jetësuar amanetin e dëshmorëve të lirisë, për një Kosovë që siguron mirëqenie, siguri e liri për të gjithë ata që jetojnë në të”, deklaroi ai. /rtk