Irani paralajmëron Anglinë: Lejimi i SHBA-së për të përdorur bazat ushtarake është pjesëmarrje në agresion

Ministri i Jashtëm i Iranit ka paralajmëruar Mbretërinë e Bashkuar se Teherani e sheh vendimin për të lejuar Shtetet e Bashkuara të përdorin bazat ushtarake britanike si pjesëmarrje në agresion.

Në një telefonatë me homologun e tij britanik, Seyyed Abbas Araghchi kritikoi qëndrimin e Mbretërisë së Bashkuar ndaj sulmit amerikano-izraelit ndaj Iranit të cilin e ka cilësuar si negativ dhe të njëanshëm.

Ai paralajmëroi se dhënia e aksesit të SHBA-së në bazat e Mbretërisë së Bashkuar me siguri do të konsiderohet pjesëmarrje në agresion.

Një zëdhënës i Downing Street u tha më vonë gazetarëve se Mbretëria e Bashkuar i dha SHBA-së qasje vetëm për një qëllim specifik mbrojtës dhe të kufizuar në përgjigje të sulmeve të Iranit në të gjithë Lindjen e Mesme.

“Pozicioni ynë ka qenë shumë i qartë që nga fillimi, Ne nuk morëm pjesë në sulmet fillestare dhe nuk do të përfshihemi në luftën më të gjerë”, tha zëdhënësi, transmeton euronews.al.

Kryeministri britanik Keir Starmer fillimisht refuzoi kërkesën e Uashingtonit për të përdorur bazat ushtarake të Mbretërisë së Bashkuar për sulmet e saj ndaj Iranit, të cilat Starmer i kuptoi si të paligjshme.

Megjithatë, Starmer iu bashkua mbrojtjes kundër hakmarrjes së Iranit pasi asetet ushtarake britanike në Lindjen e Mesme u sulmuan.