E plagosi aksidentalisht në kokë familjarin e tij 16-vjeçar, IPK jep detaje për rastin e rëndë në Istog

Inspektorati Policor i Kosovës ka dhënë detaje lidhur me rastin e incidentit me armë zjarri, ku mbeti i plagosur një i mitur në fshatin Dubravë të Istogut nga ana e një zyrtari policor.

Sipas IPK-së, viktima 16-vjeçar është plagosur në kokë, dhe ka lidhje familjare me policin. Ai është dërguar me urgjencë për trajtim mjekësor fillimisht në Spitalin Rajonal të Pejës, e pastaj në QKUK në Prishtinë.

“Bazuar në hetimet preliminare fillestare, dyshohet se rasti ka ndodhur në shtëpinë e zyrtarit policor i cili deri në këtë fazë të hetimit dyshohet se aksidentalisht ka shkrepur armën zyrtare”.

“Personi i dyshuar në këtë rast (zyrtari policor) është arrestuar nga Inspektorati Policor me dyshimin se i njëjti ka kryer veprën penale  “vrasje e mbetur në tentativë”, kurse me vendim të prokurorit të njëjtit i është caktuar masa e ndalimit për 48 orë si dhe është suspenduar nga detyra”, thuhet tutje në njoftimin e IPK-së.