Diplomacia në prapaskenë mes luftimeve, zyrtari i lartë iranian në Pakistan për të shpëtuar marrëveshjen me SHBA-në
Përpjekjet diplomatike për zbutjen e krizës ushtarake mes Uashingtonit dhe Teheranit u zhvendosën këtë të martë në Islamabad, ku një zyrtar i lartë iranian nisi takimet me ndërmjetësit pakistanezë. Vizita zhvillohet në një kohë kur luftimet e ripërtërira mes Shteteve të Bashkuara dhe Iranit kanë hyrë në ditën e tyre të 10-të, me të dyja palët që vazhdojnë goditjet reciproke në terren.
Ministri i Brendshëm i Iranit, Eskandar Momeni, mbërriti në kryeqytetin pakistanez në kuadër të një ofensive diplomatike intensive të ndërmarrë nga Islamabadi zyrtar për të ringjallur paktin e përkohshëm që dështoi së fundmi.
Takimet e nivelit të lartë në Islamabad
Gjatë qëndrimit të tij, Momeni u prit nga drejtuesit më të lartë ushtarakë dhe politikë të vendit pritës. Bisedimet u fokusuan në gjetjen e një mekanizmi që mund të çojë në ndalimin e armiqësive.
Sipas burimeve zyrtare që folën në kushte anonimiteti, delegacioni iranian u takua fillimisht me shefin e Shtabit të Ushtrisë dhe të Forcave të Mbrojtjes të Pakistanit, Feldmarshallin Asim Munir. Më pas, Momeni zhvilloi një takim të dytë me kryeministrin Shehbaz Sharif.
“Udhëheqja politike e Pakistanit dhe Feldmarshali Asim Munir kanë punuar për të bindur Shtetet e Bashkuara dhe Iranin që të rifillojnë negociatat.”, thane burime zyrtare nga bisedimet me dyer të mbyllura
Sfidat e ndërmjetësimit
Pavarësisht angazhimit të drejtpërdrejtë të Pakistanit si urë lidhëse mes dy fuqive, vëzhguesit ndërkombëtarë mbeten skeptikë mbi mundësinë e arritjes së një kompromisi të shpejtë. Intensiteti i sulmeve në terren dhe dështimi i marrëveshjes së mëparshme e bëjnë kornizën e një pakti të ri të paqartë.
Roli i Pakistanit konsiderohet kyç për shkak të marrëdhënieve strategjike që mban si me Uashingtonin, ashtu edhe me Teheranin fqinj. Mbetet për t’u parë nëse propozimet e reja të hartuara në Islamabad do të pranohen nga administrata amerikane për t’i dhënë fund luftimeve. /rtsh/