Barcelona fiton Superkupën e Spanjës, mposht Realin në një superpërballje

Një paraqitje vendimtare nga Raphinha i siguroi Barcelonës fitoren 3-2 ndaj Real Madridit në finalen e Superkupës së Spanjës, e zhvilluar në “King Abdullah Sport City Stadium”, duke i dhënë katalanasve trofeun për herë të parë që nga viti 2011, shkruan Rekordi.net.

Në një stadium të njohur si “Xhevahiri”, Real Madridi e nisi më agresivisht takimin, me Vinícius Junior që testoi portierin Joan Garcia që në minutat e para. Megjithatë, Barcelona shpejt mori kontrollin përmes lojës së saj karakteristike me pasime, ndërsa Alvaro Carreras i Realit shpëtoi nga kartoni i kuq pas një ndërhyrjeje të rrezikshme ndaj Lamine Yamal.

Raphinha ishte lojtari më aktiv për Barcelonën, duke krijuar rrezik të vazhdueshëm para portës së Thibaut Courtois. Pas disa rasteve të humbura, braziliani u shlye duke kaluar Barçën në epërsi me një goditje të saktë. Real Madridi reagoi dhe barazoi në fund të pjesës së parë falë një aksioni individual brilant të Vinicius.

Megjithatë, gëzimi i madrilenëve zgjati pak, pasi Robert Lewandowski shfrytëzoi në mënyrë perfekte vijën e ofsajdit për të shënuar golin e dytë të Barcelonës. Reali arriti sërish të barazojë me Gonzalo Garcían pas një kaosi në zonë nga goditja e këndit, duke e mbyllur pjesën e parë në 2-2.

Në pjesën e dytë, Real Madridi u shfaq më kërkues, por Joan Garcia bëri një pritje vendimtare ndaj Vinicius. Loja u bë më e ashpër, me shumë faulle dhe kartonë të verdhë, ndërsa të dy trajnerët tentuan të ndryshonin rrjedhën e ndeshjes me zëvendësime.

Momentin vendimtar e solli sërish Raphinha, kur goditja e tij me të djathtën u devijua nga Raul Asencio dhe përfundoi në rrjetë, duke i dhënë Barcelonës avantazhin përfundimtar. Pavarësisht presionit të madh në minutat e fundit dhe largimit të Frenkie de Jong pas një përplasjeje me Kylian Mbappe, katalanasit rezistuan dhe siguruan trofeun.

Me këtë fitore, Barcelona zgjat serinë e saj në 10 fitore radhazi në të gjitha garat, duke shënuar të paktën dy gola në çdo ndeshje – një tregues i qartë i formës së shkëlqyer të skuadrës dhe i rolit vendimtar të Raphinhas. /Rekordi.net