Atalanta ‘rrëzon’ Juventusin, Zhegrova luan 13-të minuta

Atalanta ka siguruar një vend në gjysmëfinalen e Kupës së Italisë, pasi mposhti bindshëm Juventusin me rezultat 3-0, duke vazhduar serinë pozitive ndaj “Zonjës së Vjetër” dhe duke mbetur e pamposhtur në katër përballjet e fundit direkte, shkruan Rekordi.net.

Juventusi e nisi ndeshjen me ritëm të lartë, duke rrezikuar që në sekondat e para përmes Khéphren Thuram, ndërsa Manuel Locatelli dhe Weston McKennie u ndalën nga mbrojtja vendase dhe portieri Marco Carnesecchi.

Megjithatë, Atalanta u stabilizua shpejt dhe nisi të krijojë raste me Charles De Ketelaere dhe Davide Zappacosta, të cilët u neutralizuan nga mbrojtësi Lloyd Kelly.

Goli i epërsisë erdhi në minutën e 27-të, kur pas një rishikimi nga VAR, Gleison Bremer u ndëshkua për prekje me dorë në zonë. Nga pika e bardhë, Gianluca Scamacca ishte i saktë, duke mposhtur Mattia Perin. Juventusi provoi të reagojë para pushimit, por pa sukses.

Edhe në pjesën e dytë, bardhezinjtë kërkuan barazimin, por Atalanta u tregua shumë e organizuar në mbrojtje. Pas minutës së 60-të, trajneri i Atalantës bëri lëvizje vendimtare nga stoli. Kamaldeen Sulemana, vetëm shtatë minuta pasi u fut në lojë, realizoi golin e dytë pas asistit të Raoul Bellanova.

Pak minuta më vonë, një tjetër zëvendësim rezultoi vendimtar. Mario Pašalić shënoi golin e tretë, duke vulosur fitoren dhe kualifikimin, pas asistit të Nikola Krstović.

Kjo fitore i jep fund serisë prej pesë ndeshjesh pa humbje të Juventusit dhe e eliminon atë në çerekfinale për sezonin e dytë radhazi. Atalanta, ndërkohë, do të përballet në gjysmëfinale me fituesin e çiftit Bologna – Lazio. /Rekordi.net