Pse Trump dhe Putin po takohen në Alaska?

SHBA dhe Rusia kanë rënë dakord të zhvillojnë një takim midis presidentëve Donald Trump dhe Vladimir Putin të premten, më 15 gusht, për të diskutuar se si t’i jepet fund luftës në Ukrainë.

Tre raunde bisedimesh midis Rusisë dhe Ukrainës të mbajtura me urdhër të Trump këtë verë ende nuk i kanë afruar të dyja palët drejt paqes.

Pse po takohen në Alaska?

SHBA bleu Alaskën nga Rusia në vitin 1867, duke i dhënë një rëndësi historike takimit. Më vonë ajo u bë shtet amerikan në vitin 1959.

Ndihmësi presidencial rus, Yuri Ushakov, theksoi se të dy vendet ishin fqinjë, dhe vetëm Ngushtica e Beringut i ndante ato.

“Duket mjaft logjike që delegacioni ynë thjesht të fluturojë mbi Ngushticën e Beringut dhe që një samit kaq i rëndësishëm dhe i shumëpritur i udhëheqësve të të dy vendeve të mbahet në Alaska”, tha Ushakov.

Takimi do të zhvillohet në Anchorage, konfirmoi Shtëpia e Bardhë të martën.

Herën e fundit që në Alaska u zhvillua një ngjarje diplomatike amerikane ishte në mars të vitit 2021, kur ekipi i sapoformuar diplomatik dhe i sigurisë kombëtare i Joe Biden u takua me homologët e tyre kinezë në Anchorage. Biseda u shndërrua në një debat të ashpër, me kinezët që akuzuan amerikanët për “përbuzje dhe hipokrizi”.

Pse po takohen Putini dhe Trumpi?

Trump ka bërë presion të fortë, pa shumë sukses, për t’i dhënë fund luftës në Ukrainë. Si kandidat presidencial, ai u zotua se mund ta përfundonte luftën brenda 24 orëve nga marrja e detyrës. Ai gjithashtu ka pohuar vazhdimisht se lufta “nuk do të kishte ndodhur kurrë” nëse ai do të kishte qenë president në kohën e pushtimit të Rusisë.

Muajin e kaluar, Trump tha se ishte “i zhgënjyer” nga Putini. Frustrimet u rritën dhe Trump i caktoi Putinit një afat deri më 8 gusht për të rënë dakord për një armëpushim të menjëhershëm ose të përballej me sanksione më të ashpra të SHBA-së.

Ndërsa afati i fundit arriti, Trump njoftoi në vend të kësaj se ai dhe Putini do të takoheshin personalisht më 15 gusht. Trump thotë se do të përpiqet të rimarrë territorin për Ukrainën në bisedimet me Putinin.

A do të marrë pjesë Ukraina?

Presidenti ukrainas Volodymyr Zelensky nuk pritet të marrë pjesë. Putini kishte kërkuar që Zelensky të mos ishte prezent, megjithëse Shtëpia e Bardhë më parë kishte thënë se Trump është i gatshëm të zhvillojë një takim trepalësh. Kur u njoftua takimi Trump-Putin, Zelensky tha se çdo marrëveshje pa kontributin e vendit të tij do të përbënte “vendime të vdekura”.

Ai është shprehur gjithashtu kundër asaj që Trump e ka quajtur “shkëmbim territoresh” duke thënë se “ai nuk do ta shpërblejmë Rusinë për atë që ka kryer.”

Çfarë shpresojnë të nxjerrin të dyja palët nga kjo?

Duke folur me gazetarët të hënën, Trump tha se Rusia kishte “pushtuar një pjesë të madhe të Ukrainës”, duke shtuar se ai “do të përpiqet të rimarrë një pjesë të atij territori për Ukrainën”. Por ai paralajmëroi gjithashtu se do të ketë “disa shkëmbime, ndryshime në territore”.

Trump tha se e shihte samitin si një “takim emocional” që synonte t’i bënte thirrje Putinit t’i jepte fund luftës. /rtsh/