Mbi 30 viktima pas shirave të rrëmbyeshëm dhe përmbytjeve në Pekin

Të paktën 34 persona kanë vdekur pas ditëve të shirave të rrëmbyeshëm dhe përmbytjeve në dhe përreth kryeqytetit kinez Pekin, raportuan sot mediet shtetërore.

”Distrikti verilindor i Miyun ishte më i godituri, me 28 vdekje”, sipas transmetuesit shtetëror CCTV.

Dy viktima të tjera u raportuan në distriktin veriperëndimor të Yanqing.

”Në provincën fqinje Hebei, të paktën katër persona vdiqën në një rrëshqitje dheu në qarkun Luanping. Të tjerë mbeten të zhdukur”, raportuan mediet lokale.

Më shumë se 80 000 persona janë evakuuar nga zonat e prekura nga përmbytjet, përfshirë rreth 17 000 nga Miyun.

Rrugët u përmbytën, automjetet u rrëmbyen dhe infrastruktura e energjisë u dëmtua në të gjithë rajonin.

Nivelet e ujit në një rezervuar të madh në Miyun arritën pikën e tyre më të lartë që nga ndërtimi i tij në vitin 1959.

Autoritetet filluan të kontrollonin shkarkimet dhe paralajmëruan banorët për përmbytje të mëtejshme të mundshme.

”Presidenti kinez Xi Jinping u kërkoi zyrtarëve të përdorin të gjitha mjetet e disponueshme për të siguruar sigurinë e popullsisë”, sipas agjencisë shtetërore të lajmeve Hsinhua.

Moti i keq në rajonin e Pekinit, i cili filloi gjatë fundjavës, shkaktoi mbylljen e vendeve turistike dhe pezullimin e shërbimeve të autobusëve dhe hekurudhave.

Shërbimi kombëtar i motit ka paralajmëruar për reshje të dendura të vazhdueshme në të gjithë Kinën veriore dhe lindore në ditët në vijim.

Pothuajse saktësisht dy vjet më parë, Pekini dhe Hebei u goditën gjithashtu nga një stuhi e fortë verore që mori jetë njerëzish.