Figo: PSG favorit në Ligën e Kampionëve

Legjenda e Real Madridit, Luis Figo, e ka cilësuar Paris Saint-Germain si favoritët kryesorë për të fituar Ligën e Kampionëve këtë sezon.

PSG do të përballet me Arsenalin në gjysmëfinale, me ndeshjen e parë që zhvillohet javën e ardhshme.

“Për mua, Paris Saint-Germain është favorit. Janë në një seri të rregullt rezultatesh dhe fizikisht janë në formë shumë të mirë. Por është e vështirë të bësh parashikime, nuk më pëlqen të them me siguri kush do ta fitojë”, ka thënë Figo.

Ish-ylli i Real Madridit, Interit dhe Barcelonës komentoi gjithashtu përballjen e Interit në gjysmëfinale.

“Janë dy skuadra me stile të ndryshme. Por Interi nuk është thjesht një ekip mbrojtës, kush mendon kështu, gabon. Interi mund ta fitojë tripletën këtë vit”, tha ai.

“Janë një skuadër shumë solide në mbrojtje – kanë pësuar shumë pak gola në Ligën e Kampionëve – por kanë edhe lojtarë që bëjnë diferencën. Prandaj duhet bërë një analizë më e plotë, jo thjesht t’i quajmë ekip mbrojtës”, ka pohuar Figo.

Me PSG që kërkon trofeun e parë evropian dhe Interin që synon tripletën historike, gjysmëfinalet premtojnë spektakël dhe rivalitet të madh.