Murati dhe Ismaili takuan zëvendësdrejtorin menaxhues të FMN-së

Ministri i Financave, Punës dhe Transfereve, Hekuran Murati dhe guvernatori i Bankës Qendrore të Republikës së Kosovës (BQK), Ahmet Ismaili, zhvilluan takim me zëvendësdrejtorin menaxhues të Fondit Monetar Ndërkombëtar (FMN), Bo Li.

Gjatë takimeve vjetore të FMN-së dhe Bankës Botërore (BB) që po mbahen në Uashington D.C., Guvernatori Ismaili e informoi z. Li për zhvillimet kryesore në sektorin financiar, zbatimin e Planit Strategjik të BQK-së dhe reformat e tjera të ndërmarra të cilat kanë kontribuar në stabilitetin dhe integritetin e sistemit financiar.

“Duke theksuar rolin vendimtar të FMN-së, Guvernatori Ismaili theksoi mbështetjen e dhënë BQK-së nga FMN-ja në forcimin e kapaciteteve të saj institucionale dhe zbatimin me sukses të rekomandimeve nga misionet e FMN-së. Gjithashtu, u diskutua për nivelin e zbatimit të kënaqshëm të Programeve që Republika e Kosovës ka të nënshkruara me FMN, ku edhe BQK ka rolin e saj dhe ka përmbushur me sukses ato detyra”, njofton BQK.

Në këtë takim, u ritheksua zotimi për vazhdimin e bashkëpunimit të ngushtë me qëllim të zbatim me sukses të projekteve të FMN-së që kanë ndikim pozitiv drejtpërdrejt në sektorin financiar dhe gjithë ekonominë e vendit.

Në kuadër të takimeve vjetore të FMN dhe BB, delegacioni i BQK-së do kenë takime bilaterale me drejtuesit e FMN-së dhe BB-së si pjesë e partneritetit të rëndësishëm institucional.