Aktivisti Naim Qorri largohen nga VV-ja, e akuzon rëndë deputetin Enver Dugolli

Aktivisti i VV-së, Naim Qorri, ka njoftuar se është larguar nga partia në pushtet.

Ai ka bërë me dje se bashkë me të janë larguar edhe dhjetëra delegatë të degës dhe aktivistë të qendrës në Drenas.

Në profilin e tij në “Facebook”, Qorri ka treguar arsyet e largimit nga kjo parti.

Për largimin e tij ai e ka fajësuar deputetin e VV-së, Enver Dugolli, i cili është kryetar i degës së VV-së në Drenas.

Ai ka thënë se deputeti i VV-së ka punësuar individë në ndërmarrje publike.

“Unë, Naim Qorri, Kryetar i Degës më të Madhe në Drenas të Lëvizjes VETËVENDOSJE!, jap dorëheqje, bashkë me dhjetëra delegatë të degës dhe aktivistë të qendrës në Drenas, të cilët kanë kontribuar me gjithë potencialin e tyre në Lëvizje. Me këtë shkrim, ju njoftoj për dorëheqjen time nga Lëvizja VETËVENDOSJE! Pas një rrugëtimi të gjatë si aktivist, marr këtë vendim në shenjë zhgënjimi dhe mospajtimi me zhvillimet e fundit në Qendrën e Lëvizjes në Drenas. Kohët e fundit, kemi përjetuar situata të padurueshme, aspak demokratike dhe denigruese nga udhëheqja e qendrës sonë, veçanërisht nga Qendra në Prishtinë me në krye Enver Dugollin. Kryetarja Egzona Tërdevci, që nga ardhja e saj në krye të degës sonë, ka instaluar një sjellje jo të shëndetshme në lëvizje, dhe së bashku me Enver Dugollin kanë punësuar individë në ndërmarrje publike dhe ministri të ndryshme në mënyrë të pandershme. Këta dy individë morën degën me 6000 vota në zgjedhjet qendrore, dhe për herë të parë morëm pesë asamblistë në zgjedhjet lokale. Megjithatë, për shkak të mos trajtimit të duhur të kërkesave, dy prej tyre tashmë nuk janë më pjesë e Lëvizjes”, ka shkruar Qorri.

Ndër të tjera, ai ka cekuar se për çka duhet të mbajë përgjegjësi deputeti i VV-së.

“Zonja Egzona Tërdevci dhe zoti Enver Dugolli mbajnë përgjegjësi për: 1. Humbjen e imazhit të degës dhe mbi 70% të anëtarësisë; 2. Manipulimet me punësime në ndërmarrje publike dhe emërime politike të personave jo meritorë; 3. Mos trajtimin e kërkesave të kryesisë, që ka sjellë humbjen e dy asamblistëve të votuar në Lëvizje, duke lënë vetëm tre nga pesë që kishim, dhe një prej tyre është gjithashtu në dilemë; 4. Ndikimin e tyre në pronat publike të Drenasit, që janë dhënë në shfrytëzim tek të afërmit e ish-asamblistit të VV-së, përfshirë Stacionin e Trenit; 5. Mosfunksionimin e zyrës në Drenas dhe mungesën e aktivitetit koherent.”, ka shkruar ai.

Ai është shprehur krenar për punën qe e ka bërë në VV.

“Egzona Tërdevci erdhi në krye me aklamacion dhe favorizon një grup të ngushtë individësh, duke linçuar dhe distancuar aktivistët, anëtarët dhe simpatizantët e tjerë. Jam krenar për shërbimin tim në pozita drejtuese, si Kryetar i Degës në Drenas, Administrator i Qendrës, gjithmonë pjesë e Shtabit zgjedhor dhe si kandidat për Asamble në Drenas. Aktivistë, anëtarë dhe simpatizantë të Lëvizjes VETËVENDOSJE!, ju falënderoj për bashkëpunimin korrekt gjatë gjithë kohës. Angazhimi im politik do të jetë në shërbim të qytetarëve të Drenasit, duke përfaqësuar interesat e tyre me dinjitet”, ka shkruar ai, raporton ballkani.