Biden: Ishte ‘detyrimi im ndaj vendit’ të largohesha nga gara presidenciale

Presidenti i SHBA-së, Joe Biden tha se kishte hoqur dorë nga gara presidenciale – për shkak të frikës se beteja brendapartiake për kandidaturën e tij do të ishte një “shpërqendrim i vërtetë” për demokratët – dhe se prioriteti i tij më i lartë ishte të mposhtte Donald Trump në nëntor, sipas BBC.

Biden tha se ishte “detyrimi i tij ndaj vendit” që të largohej nga zgjedhjet presidenciale të 2024 dhe të parandalonte atë që do të ishte “një rrezik i vërtetë për sigurinë amerikane” nëse Donald Trump fitonte një mandat të dytë.

“Megjithëse kam nderin e madh të jem president, mendoj se kam një detyrim ndaj vendit – – të bëj gjënë më të rëndësishme – dhe kjo është – që ne duhet të mposhtim Trumpin”, tha ai.

Në intervistën e tij të parë që nga largimi nga gara, Biden, 81 vjeç, tha se nuk kishte “asnjë problem serioz” me shëndetin e tij.

Ai e lidhi performancën e tij të dobët gjatë debatit me Trump me sëmundjen e tij – duke përmendur si faktorë – vonesën në avion dhe mungesën e pushimit – duke hequr shqetësimet për moshën dhe mprehtësinë e tij mendore.

Presidenti amerikan u zotua të mbështesë Kamala Harris.

“Kolegët e mi demokratë në Dhomën e Përfaqësuesve dhe Senatit menduan se unë do t’i dëmtoja ata në garë”, tha ai.

Ish-kryetarja e Dhomës së Përfaqësuesve, Nancy Pelosi, u raportua gjerësisht se ka udhëhequr përpjekjet për të rrëzuar Biden – një pretendim që ajo nuk e ka mohuar saktësisht – pas debatit të tij televiziv kundër Trump më 27 qershor.

Ndërsa presioni vazhdoi të rritej, ai njoftoi largimin e tij nga gara më 21 korrik.

Një betejë e mundshme për ta zëvendësuar atë në krye të Demokratëve nuk u materializua kurrë dhe mbështetja e partisë u bashkua me shpejtësi rreth zëvendëspresidentes Kamala Harris, e cila deri më tani ka tejkaluar Biden në sondazhet e opinionit. /atsh/