Gjykata Themelore në Shkup i ka caktuar masën e paraburgimit prej një muaji shtetasit të Kosovës, Blerim Ramadani, bëri të ditur Ministria e Punëve të Jashtme dhe Diasporës e Kosovës, ka njoftuar Rel.
Ramadani u arrestua më 17 korrik në pikëkalimin kufitar Jazhincë – që lidh Kosovën dhe Maqedoninë e Veriut – në bazë të një fletarrestimi të lëshuar nga Gjykata në Beograd, përmes INTERPOL Serbia, nën akuza për krime lufte.
Sipas MPJD-së, autoritetet serbe e akuzojnë Ramadanin se ka kryer krime lufte në rajonin e Nerodimes verën e vitit 1999.
“Ambasada e Republikës së Kosovës në Shkup është angazhuar me ekip të ekspertëve juridikë për lirimin sa më të shpejtë të zotit Ramadani dhe kthimin e tij në familje. MPJD dhe institucionet e Kosovës do të përdorin të gjitha kanalet diplomatike për të siguruar lirimin e shtetasit tonë”, tha MPJD-ja përmes një njoftimin për medie.
Më herët gjatë 18 korrikut, autoritetet maqedonase konfirmuan arrestimin e Ramadanit në bazë të kërkesës të bërë nga Serbia.
Ramadani, sipas MPJD-së, ka qenë anëtar i Zonës Operative të Nerodimes të Ushtrisë Çlirimtare të Kosovës.
Së fundi, autoritetet në Serbi kanë arrestuar edhe katër shtetas të Kosovës, të cilët Beogradi i ka akuzuar për krime lufte.